Shillong, K’Lyngkot 06: Ka DPK Multi-Ventures kan sa pynlong ia ka tamasa tlang harud wah Umngi ia kaba la tip kum ka 1st Umngi Winter Beach Festival 2024 ha Dangar Mawsynram East Khasi Hills District.
Ia kane ka tamasa Umngi Winter Beach Festival 2024 la pynlong ban kyntiew ia ka kam jngohkai pyrthei, bad ban aikam aijam ïa ki samla.
Haba pynbna ia kane u Bah James Paul Iawphniaw u secretary ka DPK Multi-Ventures ula pyntip ba kane ka tamasa yn pynlong ha ki ar sngi naduh ka 12 haduh ka 13 tarik mynta u Kyllalyngkot 2024.
u Bah James ula iathuh ba ki jingthmu ban pynlong ia kane ka tamasa ka long ban plie lad shuh shuh ia katei ka wah Umngi kaba itynnad kaba iasyriem bad ka beach ha Goa.
Ula iathuh ba kane ka tamasa kan plie lad ia ki samla ka thaiñ ba kin pynpaw pyrthei ia ki sap ba ki don, ban pynriew spah ia ka riti dustur tynrai, bad lyngba kane ka Festival kan nang khring shuh shuh ia ki nong jngohkai pyrthei la ka long napoh la ka jong ka Jylla bad na shabar jong ka ruh kumjuh.
Naka liang u Bah Armstrong L Thongni uba dei uwei u nongïalam jong kane ka kynhun haba bynrap lang u la iathuh ba ha katei ka Festival kin don shibun ki jingpynbyrngia kiban khring ia ki paidbah naduh ka tem ka put, ka rwai ka siaw na ki nongrwai ba paw ka Jylla kynthup ka kynhun Snow White, Gracyl Ropmay, DJ Bryan nalor kiwei kiwei.
U Bah Amstrong ula pyntip ruh ba ha katei ka sngi yn pynlong ruh ka jingpyniakop thei bhabriew ne ka Miss Beach Festival Contest ia kaba la pynkhreh ruh da ka song pisa kaba T. 40000 ia kaba wan nyngkong, T. 25000 ba ar bad ia ka kyrdan ba lai T. 15000 bad la khmih lynti ruh ba ka jingwan poi ki paidbah kiba ïashim bynta ha katei ka tamasa kan ym duna ia ka 2 hajar ngut shi sngi.
