Shillong, Naiwieng 13 : Ka Iewdak Municipal Market, ka Iew ha Laban bala don naduh ka por ki shipai Bilat, kan sa ioh ia ka dur ba thymmai da ka jingbuh mawnongrim u MLA bad Myntri Sorkar Bah Sanbor Shullai, ban tei noh da ka Iing ba san mala ha kane ka iew.
Ia une u mawnongrim la buh hynnin ka sngi saitjain bad la buhpor ban pyndep ia ka jingtei hapoh ka 24 bnai. Ia kane ka skhim ban tei ia ka Iew ba thymmai ha Laban la bei tyngka naka skhim NEC, ME-2552, OH- Creation of Capital Assets kaba kot haduh T. 14,27,500.
Haba iakren bad ki nongthoh khubor, u Bah Sanbor ula iathuh ba kane ka Iew ba thymmai kan don haduh 200 tam ki dukan ia kaba ka jingtei kan sa sdang noh shen.
Une u MLA ula ong ba ka Dorbar Shnong bad ma u, kila pyrshang kat ki lad ki lynti ban pynneh pynsah ia kane ka Iew kaba la rim bha ha Jylla.
“Kane ka Iew kan aikam aijam ia ki samla bala nang la stad jong ka Greater Raid Laban namar kane ka Iew ba thymmai kan don bun bah ki dukan” ula bynrap.
Ula ong ba nalor ki dukan, kan don ruh ka jaka pynieng kali ha ka mala ba nyngkong bad yn pyndait ruh da ka lift ban pynsuk ia ka leit ka wan. Ula pyntip ruh ba ha kane ka Iew kan don ruh ka Cultural Complex ha kawei na kine ki mala.
