Shillong, Naiwieng 13: Ka Manipur kala ioh ban khur ia ki takma ksiar ha ka jingialehkai wushu bad taekwando jong ka 2nd North East Olympic Games ba long hynnin ka sngi saitjain.
Ha ka jingialehkai wushu bala pynlong ha NEHU Campus, ia ka men’s gold taolu la ioh da u Salam Marshal Singh na Manipur katba u Tonmoy Boro na Assam ula wan ba-ar bad u Kyrshanbor R Songthiang na Meghalaya bad u Pongchoi Reham na Arunachal Pradesh kila wan balai.
Ha jong ki kynthei pat, ia ka nam lahduh la ioh da ka Yumlembam Echangtombi Devi na Manipur bad kaba wan ba-ar ka dei ka Yani Eru na Arunachal Pradesh bad ba lai ka dei ka Espiranza S Songthiang na Meghalaya bad ka Nistha Dutta na Assam.
Ha ka jingialekai taekwondo bala pynlong ha Assam Rifles Indoor Stadium, Laitkor, ka Manipur kala khur ia ka takma ksiar ha ka junior girls kyorugi ha ka kyrdan U-42kg, U-44 kg, U-46 kg bad U-55 kg lyngba i Martin Wahengbam, Irom Bijaya Devi, Priyadarshini Mayengbam bad Salam Charlei Devi.
Ka Assam kala ioh artylli ki takma ksiar lyngba ka Anshika Singh ha ka U-49kg bad ka Nayatri Cheria ha ka U052 kg.
Ha ka junior boys Kyorugi, kan baroh ki Jylla kila ioh khur ia ka takma ksiar ha kaba ka Nagaland kala ioh rah ia kawei ka takma ksiar lyngba u Tenloi Phon ha ka U-45kg, ka Assam kala ioh artylli lyngba u Debasis Chetia ha ka U-48kg bad Rahul Phukan ha ka U-51kg, ka Manipur kawei lyngba u Arubam Kishan Singh ha ka U-55 kg, ka Mizoram kawei lyngba u Lalremmuana ha ka U-59 kg bad ka Arunachal Pradesh ha ka U-63 kg lyngba u Nared Jomoh.
Ka jingialehkai Judo kan sdang mynta ka sngi U Blei ha Laban SC Indoor Stadium bad ka Karate kan long lashai ka sngi nyngkong ha SAI Training Centre, NEHU.
