Shillong, Sep 28: Ka Tura District Cricket Association kala pynrem ia ka West Jaintia Hills DCA da 6 wiket ban long ka kynhun kaba nyngkong eh ban poi sha ka phainal jong ka Meghalaya Cricket Association U-19 Boys Inter District Cricket Tournament kaba la long ha Salpara, Mendipathar, hynne ka sngi.
Ha kane ka Semi Phainal kaba nyngkong ka WJH kala tied nyngkong kala kamai tang 116 run, out 9 ngut ha ka 40 Over. U Ewanmidao Pyrtuh ula kamai 24 run bad u Dawanchwami Passah ula kamai 25 run bad na ka jingbym lah ki nongtied ka WJH kam shym la lah ban kamai bun ia ka run.
Na ki nongkawang bol ka TDCA, u Ben Haden N Marak ula ioh 3 wiket bad ai 9 run, u Fernando Barbaryo M Sangma ula ioh 2 wiket bad ai 21 run bad u Denikcheng Marak ula ioh 2 wiket bad ai 25 run.
Ka Tura kaba la beh ia katei ka thong, ha ka over kaba 10 kala kamai 29 run bad hap 4 wiket, hynreihadien u Shahin Alone ula kamai 52 run bad u John Venny ula kamai 27 run bad kine baroh ar ngut kila ia tied haduh ban da ka pynjop ia ka Tura ha ka 24.5 over.
U nongkawang bol jong ka WJH Chwamiki Ryngkhlem, ula ioh 3 wiket bad ai 27 run.
Lashai ka sngi ha katei kajuh hi ka jaka, ka jingiakhun ia kasemi phainal ka baar kan long hapdeng ka East Garo Hills DCA pyrshah ia ka Shillong Cricket Association A.
