Shillong, Nohprah 09: Ka Meghalaya ka la tehlakam ia ka Nagaland ha ka sngi ialehkai kaba ar jong ka lympung U-19 Men’s Cooch Behar Trophy 2025-26, ha kaba haduh haduh ba kut jong ka sngi, ka la lah ba kan tam da kumba 284 ron.
U nam tam na bynta ka Meghalaya u dei u Sameer Choudhury uba la lah ban bol bha tad haduh ba un da ioh ban khur 6/40.
Ka khana jong ka sngi ka long ba ka Nagaland kaba la wan ba kan bteng na ka 20 ron hadien ba la hap noh 2 wiket, ka la lap ba hap lut baroh ki wiket ba sah ki jong ka hadien ba ka la kamai tang 165 ron, kaba long tang hapoh shiteng kynta hadien ka jingiabam ja sngi, hynrei donbok ba ka la lait na ka shrip jong ka follow-on, kaba la pynlong ia ka Meghalaya ba kan tam shakhmat da 147 ron, bad haba wan ban tied ia ka pali kaba ar, ka la lah ba kan kamai 137 ron bad hap noh 5 wiket.
Ha ka step kaba sdang jong ka sngi kaba ar, ka Nagaland, ka, ka la dem iakhun tyngeh bad shan katba lah ha ki 10 over ba nyngkong jong ka step, ha kaba wiket ba nyngkong ban hap jong ka step dei ka jong u Yashimeren Jamir uba la lah ban kamai 6 ron ba la wan na ki 51 tylli ki bol ha u Gaurav Narleng (2/22).
Hadien kane, la mih madan ka jingiakhun na u Shyerinlo Thong uba la lah ban kamai 41 ron na ki 104 tylli ki bol bad bynrap shuh shuh sa u Vizoletuo Zhale (35 na ki 38), bad seng ia ka nongrim kamai ron paralok kaba 39 ron bad u Amongti Longkumer (13 not out na ki 25) kaba la pyllait ia ka Nagaland na ka shirip ban hap follow-on.
Nalor u Sameer bad u Narleng kiwei kiwei pat ki bolwer ka Meghalaya ba la ioh ban ia khur lem ki wiket ki long u Gaurav Jyoti Thakuria (1/31) bad Mewankitbok Kharpuri (1/50)
Haba la wan pat ban sdang ban wan tied ia ka pali kaba ar, lai ngut ki batsman ka Meghalaya ki la out noh hadien ba ki la lah ban kamai palat ia ka 20 ron bad kine ki long u Narleng (25), Dipayan Nandi (24) bad Sameer (23). Hynrei shwa ba kiei kiei kiba kham eh kin wan ban jia, la lap ba wan mih madan noh pat u Thakuria (22) bad u Rudra Singh Rathor (14 not out).
Katba ki nongkawang bol ba la kham paw ka Nagaland ki long u Medempok Pongen uba la ioh ban khur of 4/29, ha kaba wiket ba nyngkong ba un khur ha ka la wan tang na ka ka over ba nyngkong ba u la wan ban bol bad iai long u bowler uba pynma bha ia ka Meghalaya.
Kumta kaba sah ia ka Nagaland hi ka long ban ialeh katba kah ban pynhap wut wut ia ki wiket ba sah ka Meghalaya khnang ba kan lah ba kan buh pat ialade hapdeng ka thong ban leit phai na kane ka jingiakhun ryngkat bad ka jingjop.
