Cooch Behar Trophy | Satang 4 wicket donkam ka Meghalaya ban jop ia ka Nagaland

Shillong, Nohprah 10: Ka Meghalaya ka donkam ba kan pynhap satang saw ki wiket jong ka Nagaland ban lah ban khur ia ka jingjop ha ka lympung ialehkai jong ka U-19 men’s Cooch Behar Trophy 2025-26 ha ka jingialehkai jong ka sngi ba-lai ha madan MCA ha Polo.

Ha kane ka kynti iakhun, ka Meghalaya ka la lah ba kan buh ia ka thong kaba long 375 ron ia ka Nagaland ban jop ia kane ka jingiakhun, kaba hangne kum ka kynhun ka la pyrshang ba kan iakhun tyngeh tad haduh ba ka la lah shwa ba kan kamai 194 ron bad ban hap noh shwa tang 2 wiket.

Shipor ki batsman ka Nagaland I kumba ki la lah ban ialehkai bha, katno tam ia ki spiunners,  kaba hangne u kapten ka  Meghalaya u Angkit Tamang u la shimti hi noh halade ban ban bol ryngkat bad u  Apandanka Marak ban pynkylla ia ka bowling ha ka kynhun, kaba hangne kine ki arngut ki la  lah pat ban pynhap  ia ki wiket ba sah ka Nagaland kaba haduh ba kut jong ka sngi, ka la lah ban kamai 208 ron hadien ba ka la hap noh 6 wiket, bad kaba donkam ia ka Nagaland ka long lashai pat ka sngi ka donkam sa kumba 167 ron  ban jop ia kane ka jingiakhun.

Kumban shu phai dien sha kane ka jingiakhun, ka Meghalaya kaba la wan ba kan sdang ia ka pali wan tied kaba ar ka jong ka na ka 137 ron hadien bala hap noh 5 wiket, ka la hap lut ki wiket ba sah hadien ba ka la kamai 227 ron, kaba shwa jong kane, ha ka pali ba nyngkong, ka Meghalaya ka la kamai 312 ron, kata ba ka Nagaland ha ka pali ba nyngkong ka jong ka, ka la lah ban kamai 165 ron.

Kumta ka sngi kaba lai bd ba khatduh jong kane ka jingiakhun hi ka long ba ki bowler ka Meghalaya ki donkam  katba lah ban pynhap ia kine ki saw wiket ba dang sah ka Nagaland ban pynkshem pat ialade ban khreh jam shakhmat ha kane ka lympung ialehkai mynta ka samoi.