Shillong,Nohprah 01: Ka Meghalaya ka la lah ban lam khmat ha ka sngi kaba nyngkong jong ka lympung ialehkai ka U-19 Men’s Cooch Behar Trophy 2025-26 pyrshah ia ka Arunachal Pradesh, kaba sdang hynne ka sngi nyngkong ha madan ialehkai ka MCA, ha Polo.
Ka khana jong kane ka jingiakhun ka long ba ka Arunachal hadien ba ka la jop ia ka jingkynting pisa, ka la ailad shwa ia ka Meghalaya ba kan wan ba kan tied nyngkong hadien ba ka la lah ba kan kamai 205 ron, bad hadien kane, ka kynhun ki bowler ki jong ka, ki la lap ba ioh ban pynhap haduh 6 tylli ki wiket jong ka Arunachal Pradesh hadien ba ka la lah ba kan kamai tang 94 ron bad haduh ba kut ka sngi ba nyngkong, ka Meghalaya kan tam da 111 ron.
Ki batsman ka Meghalaya kiba la lah ban kham noh synniang sha u sup u thiar kamai ron ia ka kynhun ki long u Sameer Choudhury 28 ron, Gaurav Jyoti Thakuria 33 ron, Rudra Singh Rathore 42 ron.
Nalor katta, u Gaurav bad u Rudra ki la sei madan ia ka nongrim kamai ron paralok kaba 56 ron naka bynta ka wiket kaba 6, kaba la biang pura ia ka kynhun hi baroh kawei ban lah ban jam sha ka thong ban kamai ia ka 200 ron.
Na ka liang ki nongkawang bol ka Arunachal, u spinner u jong ka u Surya Singh u la ioh ban khur 4 wiket naka bynta 39 ron na ki 14.4 over.
Hadien ba ka Arunachal ka la wan ba kan sdang pat ia la ka pali tied (batting) ka jong ka, ia ka bol kaba thymmai la bynshet ha Apandanka Marak bad ha u leg spinner u Mewankitbok Kharpuri, ha kaba kine baroh arngut ki la pyndep hok ia la ka kamram kumba la bynshet ha ki bad kaba pynlong ia ka Arunachal ba kan hap 6 wiket.
Kiwei kiwei pat ki bowler ka Meghalaya kiba la ioh ban ia khur lem ia ki wiket ki jong ki, ki long u Angkit Tamang, Gaurav Narleng, Benedict Jones Makdoh.
Kumta ka sngi kaba ar ka long ba ka Meghalaya kan pyrshang ban pynhap kham kloi ia ki wiket kiba sah ka Arunachal khang ba kan lah ban nahg the lakam shuh shuh ia kane ka jingkhun.
