Shillong, Naiwieng 20: U Gaurav Narleng ula duh ia ka Century da kaba duna 5 run hynrei ula pyni pat ia ka jingtbit ka jongu ban ialehkai Cricket naka bynta ka jylla Meghalaya pyrshah ia ka Delhi ha ka sngi sdang jong ka U-19 Men’s Cooch Behar Trophy Elite Group A kaba la long ha MCA Ground, Polo hynne ka sngi.
U Gaurav ula khyllem noh da kaba kamai 95 run ha kaba ka Meghalaya kala jied ban tied nyngkong bad kala kamai 239 run bad hap 7 wiket ha ki 98 over.
Ka Meghalaya kalamad ia ka jingeh ha kaba kala kamai 44 run bad hap 4 wiket bad hadien kane kala kamai 75 run bad hap 5 wiket, hynrei u Gaurav bad u Kshitij Singhania (52 ym pat out) kila bteng ban neh hapoh ka madan bad kila lah ban ia kamai lang 86 run, hashwa ba u Gaurav yn shah pynhap noh ha u Dhanya Nakra.
U Kshitij, ula bteng ban neh bad ula ioh ia ka jingkyrshan na u Angkit Tamang (22 ym pat out) bad kine kila lah ban ia kamai lang 54 run.
U nongkawang bol ka Delhi u Udhav Mohan ula ioh khur 3 wiket bad ai 72 run bad ula long u nongkawang bol uba la ioh khur bun ki wiket na ki nongkawang bol ka Delhi.
Kane kadei ka sien kaba lai ba ka Meghalaya kala ialehkai, ha kaba kala shah pynrem ha ka Chandigarh bad Odisha, hynrei mynta ka nsgi nongialehkai ka Meghalaya kila lah ban ialehkai bha. Ha kawei pat ka liang ka Delhi kala jop shisien bad kala mad ia ka jingrem shisien.
Hashwa ban sdang ka jingiakhun ki nongialam jong ka Meghalaya Cricket Association kila pynkup burom ia ki nongpyniaid ia ka jingialehkai Cricket bad ia ka kynhun ialehkai jong ka Delhi. Kila pdiang burom ruh ia u Coach jong ka Delhi u Yogesh Nagar, uba ha ki snem 2018-19 ula long u nongialehkai uba mihkhmat ia ka jylla Meghalaya kum u Guest Professional Player bad la pdiang sngewbha ia u da u Honorary Secretary ka MCA u Bah Gideon Kharkongor.
