Shillong, Nailur 09: U Myntri Rangbah ka Jylla Conrad Kongkal Sangma hynne ka sngi Thohdieng ula pyntip ba ka Sorkar Jylla kan sa pan jingpynshai na ki Heh Pulit jong ka Tactical Team-I kiba don bynta ha ka jingkhynra kaba lam sha ka jingiap jong u Nongialam barim ka HNLC Bah Cheristerfield Thangkhiew.
Ia kane ka rai la shim hadien bala wanrah ia ka kaiphod jingtohkit jong ka Inquiry Commission u Justice T Vaiphei hapoh ka Iingdorbar Thaw Ain hynne ka sngi sdang jong ka Dorbar Synrai.
Ka kaiphod kala ong ba ka jingkhynra ka dei kaba la plan bha hynrei kam shym la iaid kum ka plan naba kane ka kynhun ka dei ban shu kem im ia u Bah Cherist.
“Hooid, ka Commission kala pyni ia kiba bun ki jingsngew halor ka rukom pynlong ia ka jingkhynra kaba lah ban leh da kawei ka lynti. Namar kata, ngin sa khot noh mardar ia baroh ki briew jong ka Tactical Team-I ba kin wanai jingpynshai. Shisien ba ngi la sngap ia kaei kaba ki don ban ong, ngin sa nang ban pyntyllun shakhmat ia ka kam” ong u Conrad haba iakren bad ki nongthoh khubor.
U Myntri Rangbah ula kular ruh ba ka Sorkar Jylla kan sa leh ia kaba donkam ban leh kat kum ka jingshem jong kane ka kaiphod.
Haba kyli balei ba ka Sorkar kam ai satia ia ka original copy jong ka kaiphod ba don lang bad ka kyrteng ki briew, u Myntri Rangbah ula pynshai ba ki kyrteng jong ki Heh Pulit la hap ban weng noh kat kum ka jingai jingmut jong ka Commission namar ka lah ban buh ia ki hapdeng ka jingma kaba khraw.
“Ka Commission kala ai jingmut ha ka kaiphod ba dei ban ym dei paidbah ia ki kyrteng jong ki Pulit na ka bynta ka bha ka miat bad ka jingshngain jong ki. Ki don ruh ki jingtohkit kiba iaid bad ki kyrteng jong ki briew kiba ai ia ki jingtip ba kongsan la hap ban weng namar ka jingma ba lah ban buh ia ki” ula ong.
Nalor kane, u Myntri Rangbah ula pyntip baka jingtohkit ka dang iaid shakhmat haba iadei bad ki jingdawa pisa ba bun ha ka kyrteng jong ka HNLC.
Ula ong ba ha ki khyndiat bnai shuwa ban jia kane ka jingjia ha 13 tarik Nailar 2021, kala don ka jingphah ia bun tylli ki shithi dawa pisa sha ki briew shimet, ki heh spah bad kala don ruh ka jingbyrngem byrsit ia ka jingim jong ki lada kim siew ia ka pisa.
Hynrei ula ong ba kine ki shithi dawa pisa kila duna bun shah hadien ba ka jingiakren kala sdang bad ka HNLC haba bynrap “Ki ang don katto katne ki khep, ngim lah ban kyntait ia kane hynrei kala duna bha ban ia kaba mynshuwa”.
U Conrad u ong ba nalor ki jingjia pynbthei bomb IED ba jia ha Jylla kiba la buh jingma ia ka jingim ki paidbah, ka Commision bad ka jingtohkit kala pynpaw shai kdar ia ka jingdonkti jong une u briew (Nongialam barim ka HNLC).
“Ka don ruh ka jingma ban dang mih ka jingpynbthei bomb hapoh ka 24 haduh 48 kynta ha Nongbah Shillong ha ka por ba ka Kynhun Pulit ka dang iakren ia kane ka kam bad kumta ka sngew donkam kyrkieh ban leit kem ia u Bah Cherist khnang ba kan hym don shuh ka jingpynbthei bomb IED. Jin ba ki Pulit kim leh eiei, lehse sa kawei ka jingbthei bombIED ka lah ban jia-ngim tip ka lah ban dei ha Police Bazaar ne ha kino kino ki jaka ba bun paidbah” ula ong.
U Myntri Rangbah ula ong ba ki paidbah ki dei ban sngewthuh ba kaei kaba ki Pulit ki pyrshang ban leh ha katei ka por ka long beit ha kaban pynthikna ia ka jinglong shngain jong ki paid nongshongshnong baroh.
