Shillong, K’lyngkot 31 : Ka Congress ha ka sngi Thohdieng kala kyntu ia ki paidbah ka Ri-lum Khasi-Jaintia ba kin kyntait ia ka Voice of the People Party (VPP) namar ka rai ban tynruh ha kaban pyntreikam ia ka Article 371 hapoh ka Jylla Meghalaya lada ka shah jied ban wan ha ka bor.
Haba iakren bad ki nongthoh khubor, u MLA ka Congress na Mylliem Bah Ronnie V Lyngdoh ula ong “Phi la iohi ia ka jing kren jong ka VPP ba lada ki wan ha ka bor, kin sa dawa ban pyntreikam ia ka Article 371. Ngam lah ban sngewthuh shuh namar ban dawa Article 371 ka long thok kum uto u briew, uba ong nga kwah ia ka Iing hynrei ynda ula ioh, u thang noh. Kumta, nga kyntu ia ki paidbah ka Ri-lum Khasi-Jaintia ba kim dei ban shah ialam bakla bad ban nym kyrshan ia kum kine ki party”.
U Bah Ronnie ula ong ba dei ka Congress party kaba la ai ia ka Sixth Schedule ia ka Jylla Meghalaya. “Haduh mynta, ka khyndew ka shyiap, ka riti ka dustur bad ka khaii ka pateng ki dei kiba la iada namar ka jingiohi jngai jong ki nongialam ka Congress lyngba ka Sixth Schedule”.
U Bah Ronnie ula ong ruh ba lada ka Article 371 ka kham khlain bor ban ia ka Sixth Schedule, balei pat ba ka Ladakh ka dawa ban pyntreikam ia ka Sixth Schedule hapoh ka jaka jong ki.
“Kane ka dei namar ka jingshisha hi ka long ba ka Article 371 kan ym iada ia ka khaii ka pateng jong ki paid riewlum. Kumta, ka Sixthh Schedule ka kham khlain bor haba phai sha ka jingiada ia ki riewlum trai muluk, ka khaii ka pateng, ka khyndew bad kiwei kiwei” ula ong haba kyntu ia ki paidbah ba kin kyrshan tylli ia ka Congress ban nang pynkhlain shuh shuh ia ka Sixth Schedule ka Riti Synshar ka Ri.
Haba kylli, une u Nongialam ka Congress ula ther tyngeh ruh ia ka VPP namar ka jingshim kylliang ia ki buit ka BJP ban shim kabu ia ka jingngeit niam jong ki paidbah.
“Kaei ka jingiapher hapdeng ka BJP bad ka VPP?. Baroh ar ki shim kabu ia ka jingsngew niam jong ki paidbah. Lada ngi kynnoh ia ka BJP ka shimkabu ia ka jingsngew niam, ka VPP ruh ka dei ia kaba hap kynnoh ba ka leh lang kumjuh” ula ong.
“Ngi lah beit ban kam ba ngi ieid Jaidynriew hynrei ki kam jong ngi kim dei ban kren da kumwei. Mynta phi kwah ban pynduh noh ia ka Sixth Schedule. Lada wan ka Article 371, ki Dorbar Shnong kin sa duh noh. Kumnp phi kam ba phi ieid Jaidbynriew. Ha kine ki 73 snem bala leit, ka Sixth Schedule kala ai jingiada ia ngi kumta balei ba ngin pynduh noh ia ka” ula ong.
U Bah Ronnie ula leit ban synran ia ki kyrtong ka party kiba leit thep kyrteng hynne ka sngi ban iakhun ia ka elekshon MDC ba kynthup ia u Bah Banphiralang Basaiawmoit na Mylliem bad u Bah Manuel Badwar na Laitumkhrah-Malki.
U Bah Banphira ula pynpaw ia ka jingsngewskhem ba ka party kan jop ia ka elekshon KHADC bad ong “Ngi la trei shitom ban jop ia ka elekshon bad ngi sngewkhlem khlem ka jingartatien ba ngin jop”.
