Shillong, K’lyngkot 31 : U MDC barim ka Laban-Mawprem Bah Ricky Shullai ha ka sngi Thohdieng, ula pynpaw ia ka jing sngewkhem ba un ioh ia ka jingjop ha kane ka elekshon ban wan sha KHADC, ka ban long la 21 tarik Rymphang.
U Bah Ricky uba dei u pyrsa jong u MLA ka BJP na South Shillong Bah Sanbor Shullai, ula shah rem tang da 19 vote ha ka elekshon 2019.
“Watla nga la shah rem, nga la rai ban bteng ia ka jingshakri paidbah bad nga ju iadon ryngkat beit bad u paidbah ka constituency ha kine ki hynriew snem bala leit bad namar ka jingieid jong ki, nga sngew skhem ba ban ioh ia ka jingjop ha ka elekshon ban wan” ong une u MDC barim haba iakren bad ki nongthoh khubor hadien ba dep thep kyrteng ha ISBT, Mawlai.
Haba kylli, u Bah Ricky yla ong “Watla nga dei u MDC barim hynrei ia ki paidbah ka constituency, nga dei u MDC ba man la ka sngi”.
Haba kren halor ki jingeh bapher bapher ba la mad da ki paidbah ka constituency, une u MDC barim ula kular ban kyntiew ia ka iohkam iohjam hapdeng ki samla lyngba ki karkhana rit (small scale industries).
