Shillong, Risaw 28: Ka kynhun ialehkai jong ka Jammu & Kashmir ka la lah ba kan pynliem noh ia ka Meghalaya da 131 ron ha ka lympung ialehkai jong ka -23 men’s Col CK Nayudu Trophy Elite Group, ba la long ha Jammu mynta ka sngi.
Kane ka jingjop ka kynhun ka J&K ka la wan ha ka sngi kaba lai jong kane ka jingiakhun, kaba la wan hadien ba ka la buh ia ka thong kaba 293 ron naka bynta ka kynhun ialehkai ka Meghalaya, ha kaba ka kynhun ialehkai ka jylla ka la lah ba kan kamai tang 161 ron.
Wat lada ka Meghalaya ka la shah rem noh, pynban 8 ngut ki nongtied (batsman) ki jong ka, ki la lah ban kynjoh sha ki ar dak jingkheiñ (double figure) ha ka liang ka jingkamai ron ka jong ki, hynrei kiba bun na kine, lah pat ban ong ba kim shim la lah ban pynjan pat ia ka kyn hun ban jam sha u line jong ka jingjop.
U nongtied ba la lahban kamai bun ron dei u Md Ashif Khan uba la lahban kamai 34 ron ba la wan na ki 35 tylli ki bol, ba kynthup 6 tylli ki boundary bud pat sa u Avinash Rai (24 na ki 30, 5x4s), ban seng artad ia ka nongrim kamai ron kaba 51 ron naka bynta ka wiket kaba lai, hadien kane, ki wiket ka Meghalaya ki la iai bteng ban khyllem uwei hadien uwei tad haduh ka khep jong u nongtied (batsman) ba 11 u PM Santosh, uba la lah ban kamai 24 ron ba la wan tang na ki 11 tylli ki ball.
Na ka liang ki bowler ka J&K u Vishal Kumar u la ioh ban khur 5/34.
Kumban shu phai dien biang sha kane ka jingiakhun, ka J&K ha ka pali ba nyngkong ka la lah ba kan kamai 207 ron, katba ka Meghalaya ka la lah ban kamai 107 ron, bad ha ka pali kaba ar (second innings) ka J&K ka la lah ba kan kamai 192 ron, katba ka Meghalaya ka 161 ron.
