Shillong, Risaw 19: Ka kynhun ialehkai jong ka Meghalaya, ki la shah liem noh da ka innings kaba long 80 ron hakhmat ka Baroda, ha ka lympung ialehkai jong ka U-23 men’s Col CK Nayudu Trophy 2025-26 Elite Group, kaba la long ha Vadodara.
Ha kane ka kynti iakhun kaba mynta jong kane ka lympung, ka Meghalaya ka la lah ba kan jam sha ka kyrdan iakhun jong ki jylla kiba la kham paw bad ba don ruh ha ka thup ne ka kyrdan ialehkai jong ka Elite Group ka Col CK Nayudu Trophy.
Kane ka jingiakhun ka la sdang naduh ka 16 tarik mynta u bnai, ha kaba ka Meghalaya kaba la jop ia ka jingkynting pisa (toss), ka la ailad shwa ia ka Baroda ba kan wan ba kan tied (batting) nyngkong, ha kaba ka la lah ba kan kamai haduh 494/6, ha shwa ba kan rai ban khylliap (declare) noh ia la ka jong ka pali ka jong ka.
Haba la dei pat ka pali ban wan ban tied (batting) ka Meghalaya arsien lynter ka la lap ba hap noh baroh ki wiket ki jong ka ha baroh ki ar pali (innings) ka jingwan tied (batting) ka jong ka hadien ba ka la lah ba kan kamai tang 273 bad 141.
Ha ka pali wan tied (batting) ba nyngkong, ka 272 ron ba ka la lah ba kan kamai ka la wan hadien ba lai ngut ki batsman ki jong ka ba kynthup ia u kapten u Kevin Christopher (89 na ki 211 balls, 9x4s, 2x6s), Md Asif Khan (60 na ki 89, 12x4s, 1×6) bad Sachin Kumar (58 na ki 156, 9x4s), ki la pynpaw ia ka jinglong kaba skhem bad ba la ih bha ka rukom ialehkai ka jong ki, hynrei ka jingeh kaba la mih paw ka long ba ki batsman ba shadien kim shim la lah ban kyrshan lem ia ka kynhun ban lah ban nang kham jan sha ka thong ba ka Baroda ka la lah ba kan kamai ha ka pali ka jong ka, hadien ba 7 wiket ki la hap noh tang hapoh 65 ron.
Hadien kane, ka Baroda, sa shisien ka la ailad biang (follow-on) ia ka Meghalaya, kaba hangne pat, ar wiket la lap ba hap noh kynsan , hynrei u Avinash Rai (48 na ki 104, 8x4s) ryngkat bad u Kevin ki la lah ban dem khui bad ban rah pat ia ka jingiakhun sha ka sngi kaba saw.
Pynban haba wan ban bteng ia ka sngi ba saw, ka la buh jingeh bha ia ki batsman ka Meghalaya , hadien ba u Kevin shwa u la lap ba out noh hadien ba u la lah ban kamai tang 7 ron, hynrei shwa ba ka Meghalaya kan pyndem ia lade ha kane ka jingiakhun, u Manish Sharma (22 ron na ki 78, 4x4s) bad Shavian (21 ron na ki 8, 3x4s), ki la ieng iakhun tyngeh, hynrei ha ka over kaba 73.5 ba ka Meghalaya ka la lap ba hap baroh ki wiket ki jong ka bad ban pynlong ia ka Baroda ba kan jop ia kane ka jingiakhun.
