Pynshah skhor bha u CM ia ka jingeh ki paidbah ha ka CM-Connect
Shillong, K’lyngkot 24 : Ki paid Nongshongshnong ka Shnong Mawpyllun, South West Khasi Hills, kila ioh ka kabu ban ud ban nam hakhmat u Myntri Rangbah ka Jylla halor ka jingwan pynjulor jong ki hati khlaw ia ki Iing ki sem bad ki jingthung jingtep hapoh ka thain.
Ki paidbah kila shim ia kane ka kabu ha ka jingleit hiar u Myntri Rangbah Conrad K Sangma, sha Ranikor hynne ka sngi Thohdieng, ban sngap ia ki jingud jingnam jong ki paidbah ia ka CM Connect Programme
Ki paidbah na kylleng ki shnong ka thain Ranikor kila wan ban iashimbynta ha kane ka jingialang ban pynsngew ia ki jingeh jong ki halor ki surok, ki kam ba iadei bad ka umbam umdih, ka jingnang kiew ki jingwan pynjulor ki hati, ka jingnang hiar ka kam ri jingri bad kiwei kiwei.
Ka Myntri ka Koit ka Khiah Kong Ampareen Lyngdoh, ki MLA Bah Pius Marwein bad Bah Renikton Lyngdoh Tongkhar kila iadonlang ha kane ka jingialang, kaba la iohi ruh ia ka jingiashimbynta jong ki Heh Ophisar kynthup u Principal Secretary P Sampath Kumar.
Lah ban kdew, ka CM Connect ka dei ka prokram bala maitphang da u Myntri Rangbah ban leit iakynduh ia ki paidbah ha manla ki shnong bad ban sngap ia ki jingeh ba ki iakynduh. Kane ka prokram kala ai ka lad ia ki paidbah ban pynsngew beit beit hakhmat u CM bad ki Ophisar ia ki jingeh bad ki jingdonkam kaba ki kwah ia ka Sorkar ba kan leh kynthup ia ki kam kiba lah ban pynbeit hangto hangto.
Kawei ka mat kaba thnem bha ha ka jingiakren ka dei ka jingshah pynjulor ki mar rep bad ki Iing ha ki hati khlaw. Ia kane, u Myntri Rangbah uba khmih ruh ia ka Tnad Khlaw, ula kular ba ka Tnad kan sa leh eiei noh mardor ia kane ka kam.
Halor ka jingujor ba ki briew ka Tnad Forest ki ju wan hapdeng ka jingbuaid haba pyntip ia ka jingwan pynjulor ki hati, u Myntri Rangbah ula ong, ka Tnad kan sa leh da kaba tyngeh pyrshah ia kino kino kiba khein sting ia ka kam. “Ka dei ka kam iap kam im jong u paidbah, bad ngin ym map satia ia ka jingkhein sting” ula ban jur.
Haba shim kabu ia ka rynsan CM-Connect, ki nongshongshnong ka shnong Nongnah kila kren halor ka lad ban kyntiew ia ki kam jngohkai ha Nongnah. Ia kane, u Myntri rangbah hangto hangto hi ula pynbna ba ka Sorkar kaba dep pynkhreh ia ka plan ban kyntiew ia ki kam jngohkai bad kala mang ia ka song pisa ba T.30 lak ban tei ia ka Resort kynthup ka jingpynbha ia ka surok kaba pyniasoh sha ka shnong jong ki.
Ki Nongshongshnong na Keniong kila pynsngew ia ka jingsngewkhia halor ka jingsniew ka surok, kaba la pynsyllang ia ki ha ka leit ka wan bad ban kit ia ki marrep, ki soh ki pai bad u latyrpad. Ka shnong Keniong ka dei kaba bna nam bha halor ka jingpynmih ia u latyrpad. Halor kane, u Myntri Rangbah ula kular ba un sa shimkhia bha ia kane ka jingpynsngew jong ki.
Ki Nongshongshnong na Pomwadar, Tibbiching bad Phlangdiloin kila kren sani bha halor ka jingbym don ki Bank bad ki lad ai jingsumar. U Myntri Rangbah ula pyntip ba un sa khmih bniah ia kine ki jingpynsngew jong ki bad ula ai ka jingbthah ban pynsdang noh ia ka Mobile Banking service hapoh ka thain. Ula kular ruh ba ia ki kam ba iadei bad ka koit ka khiah bad ka pule dangle, un sa shimkhia hakhmat duh na ka bynta ka thain.
Ki Nongshongshnong na Khongjoy A kila pynpaw ia ka jingsngewkhia hakhmat u Myntri Rangbah halor ki jingeh bapher bapher bala mad da ki paidbah kiba sah ha khappud, khamtam ka jingbym biang ka umbam umdih bad ka bording elektrik.
Haba jubab ia kane, u Myntri Rangbah ula bthah ia ki Ophisar ba kin pynbeit noh mar mar ia kane ka kam. Halor ka jingujor ba pynslem ia ka jingpyntreikam ia ka Jal Jeevan Mission, ula bthah ia ki Ophisar ban pynthikna ba ki nongshong shnong ki dei ban ioh noh ia ka um hapoh u bnai Iaiong 2025.
Ki Nongrep na ki shnong bapher bapher ha kane ka sur, kila iathuh ia ka khana halor ka jinghiar ka jingpynmih ia ki marrep bad pan ia ka jingkyrshan na u Myntri Rangbah, ia kaba ula ong ba ki nongrep ki lah ban shim kabu ia ka skhim kum ka CM Farm Plus bad kiwei kiwei ban ioh jingkyrshan.
Ha kane ka prokram, u Myntri Rangbah lem bad ki heh ki hain kila aiti ruh ia ki song jingiarap pisa na ki skhim bapher bapher sha ki nongioh bynta jong ka Ranikor C&RD Block.
Ia kane ka prokram la pynwai da ka jingpynshlur jong u Myntri Rangbah ia ki paidbah ba kin iai bteng ban pyntip ia ki jingeh ba ki iakynduh lyngba ka CM Connect helpline (1971) lane ka grievance desk bala buh ha ka thain.
