Shillong, March 21: Ka Football kadei ka jingialehkai kaba bun ki sngewtynnad ban peitkai bad kan long kaei kaei kaba itynnad ba ha ka 25 tarik u Lber, baroh kin phaikhmat ia ka jingiakhun hapdeng ka ri India pyrshah ia ka Bangladesh ha ka AFC Asian Cup Qualifier kaban long ha JN Stadium, Shillong bad la khmih lynti ba ki paidbah kin dap smam ban wan peit ia kane ka jingiakhun hapdeng kine ki ar tylli ki ri jong ka dewbah Asia.
Ka jingiakhun ha ka 25 tarik hapdeng ka India pyrshah ia ka Bangladesh kan long kaba shongshit bad bun kila sdang ban iakren mynta ba ka jingiakhun ha katei ka sngi kan long ruh hapdeng jong u khlur pawnam ka ri India u Sunil Chhetri pyrshah ia u nongialehkai ka Club na England ka Sheffield United u Hamza Choudhury jong ka ri Bangladesh.
Ka jingiatai ha ki rynsan social media kala shongshit bha na ka bynta katei ka jingiakhun, ha kaba ki nongkyrshan jong ka ri India kila pynksan bad kyrshan ia u Sunil Chhetri, katba ki nongkyrshan ka ri Bangladesh kila iashah ia u Hamza hynrei mano ban jop ia kane ka jingiania kan dei beit ha ka jingiakhun hapoh madan hapdeng kitei ki khlur ialehkai kiba pawnam.
U Hamza Choudhury udei u nongialehkai ha ka English Premier League kum u Midfielder jongka Sheffield United uba la pyniasoh na ka Leicester City bad dang shen ula rai ban iehnoh ia ka England bad ban mihkhmat noh ia ka ri Bangladesh, kum ka dak ban ai burom ia la ka kmie.
U Hamza ula ialehkai 7 sien na ka ri England ha ka U-21, ula shim noh ia ka Passport Bangladesh ha u Nailar 2024 bad ka FIFA kala ai jingmynjur ia kane ha u bnai Nohprah. Ka jingwan ka jongu ban ialehkai na ka ri Bangladesh kala ai mynsiem ia ki nongkyrshan ka ri Bangladesh bad ki kyrmen skhem ba u Hamza yn long u nongialehkai uban pynkylla ia ka rukom ialehkai pyrshah ia ka India.
Ha kawei pat ka liang, u Sunil Chhetri udei u nongialehkai uba la thep bun kol eh na ka bynta ka ri India bad ula ioh thep 94 kol ha ki 150 sien jong ka jingialehkai football kaba ula mihkhmat ia ka ri bad kane kala pynlong syndon ia u ban long u nongialehkai uba saw ha ka pyrthei ban ioh thep bun kol ha ka Men’s International Football, kata hadien jong u Cristiano Ronaldo, Ali Daei bad u Lionel Messi.
U Chhetri ula dep pynbna ban shongthait ban mihkhmat ia ka ri India ha ka jingialehkai Football ha u Jymmang 2024 hadien ba ula ialehkai haduh 19 snem, hynrei ha u Lber 2025 ula pynbna ba yn wanphai biang ban ialehkai na ka bynta ka ri India.
U Hamza Choudhury yn dei u nongialehkai ba nyngkong eh jong ka Premier League ban ialehkai ha Shillong bad kan dei ruh ka sien kaba nyngkong ia u ba yn phong da ka spoti ne jersey jongka ri Bangladesh. Katba u Sunil Chhetri ula thep ia ka kol kaba nyngkong ka jongu ha Shillong hadien ba ula wanphai biang ban ialehkai na ka bynta ka ri India.
Ka Rekod hapdeng ka India bad ka Bangladesh
•Lah iakhun 31 sien
•Ka India kala jop 16 sien
•Ka Bangladesh kala jop 2 sien
•Iakhaid 13 sien
Ki jingiakhun kiba pawnam:
•FIFA World Cup Qualifiers:
•Ka India bad Bangladesh kila iakynduh bunsien ha ka jingiakhun ban ioh rung sha ka World Cup. Ha ka jingiakynduh ka jongki ha ka 15 tarik u Risaw 2019 ka jingiakhun kala kut ha ka jingiakhaid, katba ha u bnai Jylliew 2021 ka India kala pynrem da 2-0 ia ka Bangladesh.
•SAFF Championship:
•Kine ki ar tylli ki ri kila iakhun bunsien, nuksa ha ka 4 tarik u Risaw 2021 ka jingiakhun kala kut ha ka jingiakhaid da 1-1.
•AFC Asian Cup Qualifiers:
•Baroh ar tylli ki kynhun kila iakynduh ha ka qualifier, ha kaba bun na ki jingiakhun kala kut ha ka jingiakhaid da 0-0 kaba la jia ha ka 6 tarik u Rymphang bad 15 tarik u Jylliew 1988.
Ki jingiakynduh kiba dang shen:
•5 tarik u Lber, 2014 (International Friendly): Ka India kala iakhaid da 2–2 bad ka Bangladesh
•15 Risaw 2019 (FIFA World Cup Qualifier): Ka India kala iakhaid bad ka Bangladesh da 1-1
• 7 tarik u Jylliew, 2021 (FIFA World Cup Qualifier): Ka India kala pynrem da 2-0 ia ka Bangladesh
•4 tarik u Risaw 2021 (SAFF Championship): Ka Bangladesh kala iakhaid bad ka India da 1-1.
