Thmu ka Sorkar ban wan ialam noh ia ki 22 ngut ki Khynnah skul na Karnataka

Shillong, Lber 21: U Commissioner & Secretary ka tnad Home (Police) Bah Cyril Diengdoh ha ka sngi Thohdieng, u pyntip ba ka Sorkar ka don jingthmu ban wan ialam noh sha Jylla ia baroh 22 ngut ki khynnah skul, kiba kem pang na ka jingngat bih na ka bam ha Mandya, Karnataka.

Haba iakren bad ki nongthoh khubor, u Bah Cyril ula ong “Ka jingthmu ka long ban wan ialam noh ia ki sha Jylla Meghalaya”.

“Hynrei, kine ki khynnah skul ki dei kiba shong klas bapher bapher- don kiba shong klas V bad don kiba shong klas VII, bad ki hap ban iakhun ia ka eksam lem kumta kin duh ei ia kane ka shisnem. Kumta, u DC ka Mandya ula pyrshang ban pynbeit ba kumno kine ki khynnah skul kin ioh ban iakhun ia ka eksam bad kane ka dei kaba kila pynpaw ruh bad khlem pep ki bor District kila kren ia ki Kmie Kpa bad hadien ba pyndep ia ki kam ki jam kat kum ka ain, ngin sa wanrah noh iaki sha Jylla” ula bynrap.

Haba kylli, u Bah Cyril ula ong “Kat haduh mynta ka sngi, nga dang iakren bad u Deputy Commissioner ka Mandya District. La pyntip ba ki Khynnah ki dang don ha hospital bad la shimkhia ban khmih ia ki da ki borkhmih ka Hospital. Ka Child Welfare Committee jong ka District ruh kala iakren bad ki bor hospital khnang ba kin pynbiang ia baroh ki jingdonkam jong kine ki Khynnah”.

U Bah Cyril u pyntip ba ki Deputy Commissioner ha Meghalaya ruh la bthah ba kin pynlait noh ia ka pisa ba mar T. 3 lak sha ki bahaiing hasem jong ki arngut ki Khynnah skul, kiba khlad noh namar ka jingioh bit na ka bam.

U Bah Cyril uba dang wan phai dang shen na Karnataka, ula pyntip ruh ba ki bor District bad ki Pulit kila dep ujor ia ka ejahar bad hynriew ngut ki briew kila shah kem kynthup ia u briew ba pyniaid ia ka skuul bad ia ka hostel beain, u trai ka restaurant bad u cook.

“Namar kata, ka jingtohkit kan iaid kat kum ka lynti jong ka ain. Ia ka ejahar la dep ban register bad ka ain kan iaid hala ka jong ka lynti” ula bynrap.