Shillong, Naiwieng 01 : Ka tamasa Cherry Blosson ka la pur khana bha mynta u snem da ki jingpynbna ia ka jingwan ban pynbyrngia da ki nongrwai bad ki kynhun tem kaba ki riew ieid jingrwai ki sngewbang eh ban sngap.
U nongrwai R&B ba pawnam ka Ri America-Akon u dei uwei na ki nongrwai ban wan ha kane ka tamasa ka Jylla ka ban long ha ka 15 bad 16 tarik Naiwieng.
Kat kum ka jingpynbeit nyngkong, u Akon ula buh ban pynlyng-uh ia ka tamasa da ki jingrwai ba pawnam jong u, ha ka 16 tarik Naiwieng. Hynrei namar ka jingpynkylla tarik na ka daw ka jingpynkylla ia ki tarik leit rwai ha kylleng ka dewbah Asia, une u nongrwai un hap ban kiew noh ha ka rynsan ka Cherry Blosson ha ka 15 tarik Naiwieng.
Namar kane, ki nongpyniaid ka tamasa kila pynbna ba ka kynhun rwai Pop ‘Clean Bandit’ kaba la jop ia ka Grammy, kan pynshongshit noh ha ka sngi kaba ar (16 tarik). Kane kan dei ka jingkiew rynsan ba nyngkong eh ha India da ka ‘Clean Bandit’ bad ka jingwan jong ki, la khmih lynti ba kan nang pynshongshit shuh shuh ia ka tamasa.
Ha ka kyrwoh, ki nongpyniaid ka Cherry Blossom kila pynbna ba ki briew kiba la thied ticket ki lah ban leit sha kane ka rynsan rwai khlem ka jingsiew tam ia ka bai ticket.
