Shillong, Naiwieng 01 : Kawei ka syiar khlaw kala wan hap hi hynne ka sngi Thohdieng ha Iaw Musiang, Jowai, katba ka jingiadie iathied ka dang thnem bha ha kane ka Iew.
Ia kane ka syiar khlaw la ioh ban kem da uwei u Rangbah uba shong dukan ha kane ka Iew bad hadien ula aiti noh ia ka sha ki Nongtrei ka Wildlife ka West Jaintia Hills District.
Une u Rangbah u dei uba la tip kyrteng u Bah Jarman Lamare uba shong ba sah ha Moosakhia. U dei ruh u Deacon jong ka Iingmane Presbyterian, Moosakhia.
U Bah Lamare u pyntip ba ula iohi ia kane ka syiar khlaw kaba shong halor jong uwei u sainar uba iaid lyngba ka iew bad hadien kane ka syiar kala shu hap hi sha madan. U iathuh ba mar kumta hi, ma u lem bad uwei u paralok kila kem ia kane ka syiar.
Une u Rangbah ula pynpaw ia ka jingdonbok ba ula ioh kem ia kane ka syiar lem kumta, kiwei kiwei ki lah ban kem bad bam doh ia ka.
Kat kum ka jingiathuh ka kong Melanie Passah, Project Manager ka Foundation for Ecological Security (FES), kane ka Syiar ka iasyiem ia ka Kalij kaba jus hem ha ka thain Shatei Lam Mihngi ka Ri India.
