Sohra, Kyllalyngkot 11 : Ka jingialang ka Kynhun Myntri shabar jong ka Secretariat ne ka Cabinet Retreat kaba la long ar sngi ha Sohra, hapoh ka jingialam jong u Myntri Rangbah ka jylla u Conrad K Sangma kala kut noh hynne ka sngi.
Ia kane ka cabinet retreat la phiah ha ki ar tylli ki bynta, ha kaba ki heh ophisar sorkar kila pynpaw ia ki jingeh bad jingtynjuh bad ia ki jingthmu ban weng ia kitei ki jingeh ban kyntiew ia ka roi ka par ha ka jylla.
Kane ka cabinet retreat, kadei kba nyngkong kaba ailad ia baroh ki tnad sorkar ban wan lang ha kajuh ka rynsan ha ka jingdon lang jong baroh ki myntri sorkar bad ban pynwandur ia ka lynti iaid jong ka Meghalaya sha ka roi ka par – Vision 2032.
Kane ka jingialang kala sdang da kaba pynleit jingmut ha kaban kyntiew ia ka imlang sahlang bad ia ki jingtei kiba donkam bad la iatai ruh ia ki jingeh bad ia ka sienjam kaba kongsan kaba dei ban shim ha kaba iadei bad ka pule puthi bad ka koit ka khiah.
Ki mat kiba kongsan kiba la ithuh da ki tnad sorkar kin long shi bynta ban pynurlong ia ka thong jong ka sorkar ban trei bad ban shimkhia shuh shuh ia ki jingsngewkhia bad ban pyniaid shaphrang ia ka roi ka par ha ka jylla.
U Myntri Rangbah ula bthah ia ki tnad sorkar ba kidei ban iatreilang da ka jingiajan ban long kiba seisoh ha kaba bun ki mawjam.
Ka jingiatai kan long shi bynta jong ka jingshimkhia da ki kam bad ban buhthong ia ka jingshimkhia kaba ka sorkar kala buh ban pynthikna ba ka Meghalaya kan kylla long kum ka jylla kaba wan ha ka kyrdan kaba 10 hapoh ka ri.
Ia kane ka jingialang la wan iashimbynta da ki myntri sorkar, ki heh ophisar sorkar bad ki Deputy Commissioner.
U Myntri Rangbah ula pynpaw ba kane ka jingialang ka long kaba seisoh bad kaba pynpeit mat.
“Kane kala long ka jingiatai kaba seisoh bad nga don ia ka jingkhmih lynti ba ka lynti iaid kaba ngi lah pynwandur yn lah ban iaid shakhmat. Ki bynta kiba kongsan na kane ka jingleh ka long ban don ia ki jingtrei ne jingleh kiba shai bad kiba batai bniah bad ban pynurlong ia ka thong kaba ngi don, ryngkat bad ka jingbuddien kaba man la ka por ban pynthikna ba ka jingpyntreikam ia ki skhim, prokram bad ki projek” ula ong.
Ula kyntu ia baroh ki tnad sorkar ba kin don ia ka jingbuh thong kaba buh da ka por ha ka rukom treikam ban lah ban pyntreikam thikna iaka jingbuh thong.
Ula kyntu ruh ia ki ophisar, myntri sorkar ba kidei ban leit jurip man la ka por ia ki jaka bad ban pyniadei bad ki paidbah.
“Ka jingleit sha ki jaka kan ai ia ki jingtip kiba bniah bha ia kaba ym lah ban ioh thik tang lyngba ki kaiphod. Ka jingiakren ha ki shnong ki thaw ka long kaba kongsan ban sngewthuh ia ka jingdonkam kaba shisha bad ia ki jingeh” ula ong.
U Myntri Rangbah ula bthah ruh ia ki Deputy Commissioner ban pynlong ia kum katei hi kajuh ka prokram ha ki kyrdan jong ka district bad ki kynhun ki jong ka.
U Chief Secretary ka jylla u Bah D P Wahlang ula ong ba kane ka jingialang kala ai ia ki tnad sorkar ba kin sam ia ki jingtip bad ia ki jingshem ki jongki, kaban iarap shibun ban don ia ka jingiatreilang bad ka jingiajan.
Ula iaroh ia ka jingpynwandur jongu Myntri Rangbah ia ka Cabinet Retreat, da kaba ong “Ka long kaei kaei kaba ai jingmut bad kaba pynphei phang. Kane ka lah ban dei ka prokram kaba nyngkong eh hapoh ka ri, ia kaba dei ban pyntip sha u Myntri Rangbahduh ka ri”.
