Shillong Nailur 02: U Symbud Myntri Rangbah ka jylla Bah Prestone Tynsong uba khmih ruh ia ka tnad PWD Roads, u la ong, ka sorkar kan suspon ia kiba ap pahara ha Jingkieng Umiam (Damsite) lada don kino kino ki trok kiba kit palat 20 Ton ki ioh iaid lyngba katei ka jingkieng.
Kane ka jingbyrngem u DyCM kala mih halor ka jingkynnoh ba ki trok kit dewiong ba khia ka jingkit, ki dang iai bteng ban iaid na kane ka jingkieng kaba la shongtor, wat hapdeng ka hukum ka Iingkashari ban ym dei shuh ban shah iaid ia ki kali ba 10 ton shaneng.
“Ki Enforcement jong ka tnad Transport bad ki Pulit ki ap pahara ha kane ka jingkieng baroh arphew saw kynta ban pynthikna ha kaban khang ia ki kali ba kit palat pud ba kin iaid na kane ka jingkieng” ong u Bah Prestone.
Ula ong, kan bha shibun ia ki paidbah ba kin ujor da kaba ai da ka jingthoh haba don ka jingiaid jong ki trok kiba kit palat pud.
“La phah ap pahara khnang ha ka jingkieng ban pynthikna ba ki trok kit mar kim dei ban kit palat iaka 20 Ton bad lada don kino kino ki trok kiba ioh iaid da kaba kit palat pud, ngin leh da kaba tyngeh ia kiba ap pahara ha ka jingkieng Dam” ong u Bah Prestone.
Haba kylli la ka sorkar kan shim iaka sienjam ban suspon syndon ia kitei kiba ap pahara, u Bah Prestone ula ong, ba ka sorkar kan leh beit da ka tyngeh.
