Shillong, Nailur 02: U Symbud Myntri Rangbah ka Jylla Bah Prestone Tynsong hynne ka sngi thohdieng ula ong ba ka Sorkar Jylla kan nym artatien ban leh da kaba tyngeh ia ka kynhun ba khot ialade “high Level” kaba donkti ban pyniaid ia ka kam khaii tuh ia u dewiong bad ki trok ha ka Jylla.
“Ngam lah ban sngewthuh kiei kita ki “High Level”? Nga ruh nga ioh jingtip lyngba ki lad pathai khubor hynrei nga sngew ba ki lad pathai khubor ki dei ban pynthikna kiei kita ki High Level, jer ia ka kyrteng ki briew ba don ha kane ka kynhun khnang ba ngin ioh ban kem ia ki” ong u Bah Prestone haba iakren bad ki nongthoh khubor.
“Jer kyrteng ia ki briew kiba donkti ban shah ia ki trok ba kin kit palar 40-50 ton bad ban iaid lyngba ka Jingkieng Umiam bad kiwei kiwei ki surok ka Jylla. Ngin leh da kaba tyngeh lada don ka jingpyniaid beain ia ki trok” ula bynrap.
U Symbud Myntri Rangbah ula kynthoh ia ka jingkylli halor ka jingkynnoh ba ki nongpahara ia ka jingkieng Umiam kila shah beit ia ki trok ba kit palat pud ba kin iaid na kane ka jingkieng namar ka jingdon jong ka kynhun “High Level”.
“Hynrei nga sngew ba lada phi pynmih ia kane ka jingkynnoh, phi dei ban pynshisha lang bad ki sakhi khnang b aka sorkar kan leh da kaba tyngeh ia kine ki kam beain” ong u bah Prestone.
U pyntip ba ka Tnad transport ym tang ba kala pynmih ia ka hukum, hynrei kala buh ruh ia ki Enforcement Inspector ha Jingkieng Umiam ban talasi bad bat ia ki trok kiba kit palat pud.
U Bah Prestone uba khmih ruh ia ka Tnad PWD (Roads) ula ong, ki trok kiba kit palat ia ka 20 metric ton kim dei satia ban iaid na kane ka jingkieng namar ki lah ban buh jingma ia ka jingkieng.
Haba kylli, ula ong ba ka Tnad kala dep ban sorjamin ia ka jaka na ka bynta ban shna iaka jingkieng ba thymmai sharum jong kane ka Jingkieng.
“Ngi la pynkhamti ha u architect ban sorjamin ia ka jaka bad ula aiktien sha ngi baka jaka ka long kaba biang bad ka surok kan mih sha ka Industrial Estate bad ruh sha ka fire brigade” ong u Bah Prestone.
Kat kum ka jingong jong u, ka jingtyrwa ba mynshuwa ban sorjamin ia ka jaka ba marjan kane ka jingkieng la hap ban pynsangeh noh hadien baka Geological Survey of india kala phah ia ka kaiphod ba ong ba ka jaka kam biang satia namar kan don ka jingpynkhynniuh ia ka jingkieng ba mynta lada don ki jingpynbthei bomb ban shna ia ka jingkieng ba thymmai.
