Shillong, Jylliew 14: U Myntri Rangbah ka Jylla Conrad Kongkal Sangma, hynne ka sngi baar ula byrngem ba ka Sorkar kan nym map satia ia kino kino ki Nongtrei Sorkar ne ki Heh Ophisar kiba donkti ha ki kam saiñ pyrthei lada ka ioh pdiang ia kano kano ka jingujor.
Kane ka jingbyrngem kala jia ruh ha ka khep ba don katto katne ki Heh Ophisar jong ki tnad bapher bapher kila iashim bynta ha ki kam saiñ pyrthei bad thmu ruh ban mih aireng ha ka elekshon MLA ban long ha u snem 2023 ha Jylla.
“Ka long kaei kaei ka bym dei bad ka bym iahap ba ki Nongtrei Sorkar kin rung ha ka kam saiñ pyrthei katba ki dang don ha ka kam bad ka Service Rules ruh kala batai shai kdar ba ki Nongtrei Sorkar kim lah ban don ne rung ha kano kano ka seng saiñ pyrthe ne ban leit ialap elekshon katba ki dang don ha ka kam” ong u Conrad haba iakren bad ka Shlem.
Haba pynpaw ba ka Sorkar kam don eiei ban ong ia ki Nongtre bala shongthait na ka kam, u Myntri Rangbah ka Jylla ula ong “Lada ki don ki Nongtrei ba dang don ha ka kam hynrei kiba kwah iakhun elekshon, ki dei ban shim noh da ka Voluntary Retirement Scheme ne ban iehnoh ia ka kam ban nym ka jingteh pyrshah ia ki”.
Uwei u Executive Engineer ka Tnad Public Works Department (Building) Bah Ransom Sutnga, dang shen ula shah kynthah jur halor ka jingkynnoh ba ula kyrsum ha ki kam saiñ pyrthei katba u dang don ha ka kam, kaba la paw na ka jingiashimbynta ha ka jingialang jong ka National Peoples Party (NPP) dang shen.
U President ka NPP-Meghalaya Dr W.Kharlukhi ula pynbna ha kane ka jingialang ba u Bah Ransom un long u kyrtong jong ka NPP ban aireng na ka North Shillong Constituency ha ka elekshon 2023.
Haba kylli, u Myntri Rangbah ula ong “Ki nongtrei sorkar ki dei ban bud ryntih ia ki kyndon aiñ bad kan sorkar kan leh da kaba tyngeh ia kiba pynkheiñ ia ka service rules”.
“Lada ngi ioh ia kino kino ki jingujor ryngkat ki sabut kiba paka pyrshah ia uno uno u nongtrei sorkar uba don bynta ha ki kam saiñ pyrthei, ka sorkar kan leh da kaba tyngeh ia kine ki briew” ula ong
