Shillong, Rymphang 02: Ka Liang Pyrshah Voice of the People Party (VPP) kala byrngem ban nym iashimbynta ha ka jingkren lamphrang u Lat ka Jylla ha ka Dorbar Mang Tyngka ka Iingdorbar Thaw Ain, lada u kren da ka ktien Hindi khlem u Nongkylla ktien sha ka phareng.
Ia kane ka rai la shim da ka jingialang jong ka Parliamentary Party ba long ha ka 30 tarik Kyllalyngkot bad ia kane ka rai la phah sha u Lamphang ka IIngdorbar Thomas A Sangma hynne ka sngi Thohdieng.
Ha ka shithi, u Secretary ka VPP Parliamentary Party Heavingstone Kharpran ula ong haba shim ia ka jinglong kongsan jong ka Dorbar Mang Tyngka bad ka jingktah jong ka ia ki paidbah ka Jyllla, ka sngew dei ia baroh ki dkhot jong ka Iingdorbar ba kin lah ban sngewthuh bad iashimbynta ha ki jingiakren.
Hynrei, la shem ba ha ka Dorbar bala lah, u Lat ka Jylla ula ai jingkren da ka ktien Hindi, kaba la buh ha ka jingeh ia ki dkhot ki bym sngewthuh ia ka Hindi bad haba buh ruh ha ka jingmut jingpyrkhat ba ka ktien Hindi kam dei sati aka Official Language jong ka Jylla Meghalaya.
“Halor kane bad na ka bynta ka VPP, nga phah ia kane rai jong ka Parliamentary Party ban kyrpad ia phi baka jingkren u Lat kan long ha ka ktien phareng bad lada u Lat um lah ban kren hapoh iing da ka ktien phareng, ka Ophis jong phi ka lah ban pynbeit ia u nongpynkylla ktien ha shilynter ka jingkren na ka bynta ka bit ka biang jong baroh ki dkhot” ula ong.
“Ka party ka kwah ban kren shai ia ka nongrim ba kan nym iashimbynta ha ka jingkren Lamphrang lada ka Assembly Secretariat kam lah ban leh eiei ia kane ka kam” ula bynrap.
