Nongpoh, Iaiong 19 : Ka Synjuk ki Rangbah Shnong ka Ri-Bhoi District, kala byrngem ban leit mudui da ka mukotduma sha Iingkashari Meghalaya High Court pyrshah ia ka hukum jong ka Khasi Hills Autonomous District Council (KHADC) ba khang ia ki Rangbah Shnong ban iashimbynta ne rung dkhot ha ki kam sain hima sima bad seng sain pyrthei.
Ka Synjuk kala rai ruh ban leit iakynduh ia u Chief Executive Member (CEM) ka KHADC bad kumjuh ruh ia u Executive Member (EM) Elaka ban pan jingpynshai bad ban dawa pynkylla noh mardor ia ka jingpynbna kaba la pynmih ha ka 4 tarik Iaiong 2023.
Kat kum kane ka jingpynbna, ka KHADC kala khang ia ki Rangbah Shnong, Matabor, Sordar ba kin iashimbynta ha ki kam sain hima sima bad ban kitkam ha ki seng sain pyrthei.
Kine ki rai jong ka Synjuk kila mih na ka jingialang jong ka Synjuk bad ki Rangbah Shnong ka Ri-Bhoi District kaba long hynne ka sngi Balang ha Umsning.
Haba iakren bad ki nongthoh khubor hadien ka jingialang, u Chairman ka Synjuk Bah BB Makdoh bad General Secretary Bah PB Sylliang, kila ong ba kane ka jingpynbna jong ka KHADC ka dei ka bym iahap satia bad ka synjuk da lei lei kan ym pdiang namar kum ki Rangbah Shnong ki hap ban pyniadei bad ki MLA ne MDC na ka bynta ka bit ka biang bad ka roi ka par jong ki shnong ki thaw.
Kat kum ka jingong jong ki, ka Them Ri-Bhoi kam dei satia ka thain kaba hap tang hapoh ka Hima Mylliem kaba don ia ka Mylliem Act, 2007 kaba khang ia ka jingiashimbynta kam sain hima sima ia ki Nongialam Shnong, hynrei ka dei kaba hap ruh ha kiwei kiwei ki Hima.
“Ta ka daw kum ka Synjuk ngi kren na ka bynta baroh ki Rangbah Shnong ka Ri-Bhoi bad ngi pyrshah jur ia ka jingpynbna ka KHADC. Ngin dawa ia ka KHADC ban pynkylla noh ia ka Mylliem Act, 2007” kila ong.
“Ki Rangbah Shnong kim dei kiba ioh jingsiew ne tulop nangno nangno ruh ne na ka KHADC…..namar kata, kam don jingmut satia ia ka KHADC ban khang iashimbynta ia ki Rangbah Shnong ha ka kam sain hima sima….kawei ruh, ngi ki Rangbah Shnong ngim ju pynbor iano iano ruh ban phah jied ia ki Nongmihkhmat ha ka por elekshon” kila bynrap.
U Bah PB Sylliang ula ong ruh ba ki Rangbah Shnong ki dei kiba la jied da u paidbah ban peit bad khmih ia ka imlang sahlang, ka roi ka par, ka bha ka miat bad ban pynneh ia ka riti ka dustur.
“Lada ngim bakla, ki MDC ruh ki dei kiba la jied da u paidbah…ki dei hi kita kiba peit ia ka riti ka durtur jong ka Ri-Khasi jong ngi hynrei kiba ioh tulop. Lada ki khang ia ngi ki Rangbah Shnong, katno tam ki MDC kiba da ioh tulop…..ki ruh lada ki don jingthmu ban iakhun elekshon MLA, ki dei ban iehnoh kam shuwa ia ka kam MDC” ula ong haba bynrap “Kane ka dei ka rai bala shim ha ka jingialang”.
