Shillong, Nohprah 05: Ka Sorkar Jylla kala byrngem ban ujor da ka mukotduma bai pyn mynrainkhmat ne phah wan panmap ia ka kot khubor Shillong Times namar ka jingkynnoh bamsap ba T.1300 klur haba pyntrei ia ka Eco-Tourism Project ha East Garo Hills.
Ia kane la pyntip da u Myntri ka Tnad Tourism Bah Paul Lyngdoh haba iakren bad ki nongthoh khubor hynne ka sngi Ba-ar.
Kat kum ka khubor bala pynmih da kane ka kot khubor phareng, la iathuh ba kawei ka seng Niksamso Garo Community Organisation (NGCO) kala kynnoh ba don ka jingbamsap ba kot palat T. 1300 klur ha ka jingpyntreikam ia ki Eco-Tourism Project ha East Garo Hills.
La kynnoh ba khyndai tylli na kine ki project bala sdang pyntrei ha u snem 2017, kim shym la lah ban pyndep kumba la paw na ki kot ki sla ioh lyngba ka RTI. La ong ba kine ki project ki dei kiba la bei pisa haduh T. 1361.45 klur.
Haba pynshai ia kane, u Myntri ula pyntip ba ka Project Eco-Tourism ba pyntrei ha East Garo Hills ka dei kaba la mang tang T. 14.39 klur bad na kane ka pisa, ka Tnad Tourism kala dep siew T. 13 klur tam sha ki contractor bad ka kam ruh kala dep kumba 95% eiei.
“Haduh mynta, ka jingmang pisa sha ki project napoh ka Tnad kam pat ju kot haduh T. 1300 klur” ong u Bah Paul.
U Bah Paul ula ong ba kane ka khubor ba pynmih (Shillong Times) ka dei kaba bakla bad kaba ialam bakla ia ki paidbah bad ka Sorkar kan sa leh ia kaba donkam halor kane, la ka dei da kaba ujor ia ka mukotduma bai pynmynrain khmat ne phah wan pan map.
U iathuh ba ia ka Eco-Tourism Project ha East Garo Hills la sdang ban pyntrei naduh 2017 bad la buh por ban pyndep 18 bnai hynrei ki kam kila sahkut namar ka jingdon noh ka ilekshon shiteng samoi ha East Garo Hills bad hadien kane kala wan sa ka khlam COVID.
