Shillong, Naitung 13 : Ka Khasi Students’ Union (KSU) kala byrngem ban pynlong ia ka jingiakhih ba thymmai kynthup ki “sienjam kiba jur”, lada ka North Eastern Indira Gandhi Regional Institute of Health & Medical Sciences (NEIGRIHMS) ka pyniaid shakhmat bad ka jingthungkam khlem da pynbeit ia ki jingdawa halor ka bhah ki riewlum bad ka bhah ki nongtrei shynrang bad kynthei.
U General Secretary ka KSU samla Reuben Najiar ula ong ha ka sngi Nyngkong ba ka seng kala aiti ia ka shithi pynkynmaw sha u Director ka NEIGRIHMS halor ka jingiamynjur lang kaba la shim ha ka 5 tarik Jymmang, 2025, hadien ka jingiakhih da kaba shong kyllain mungor ba san sngi.
“Hadien ka jingialang bala lamkhmat da u Myntri barim ka Sorkar Bah Paul Lyngdoh bad ki Heh Ophisar na NEIGRIHMS, ka Sorkar Jylla…..ngi la shim ia ka rai ba ka NEIGRIHMS kan nym pyniaid shakhmat ia ka jingthungkam thungkam tad haduh ban da lah pynbeit ia kine ki kam” ong u samla Najiar.
Ula kynnoh ba wat hapdeng ka jingkular ban pynbeit ia kane ka kam hapoh ka shibnai bad ban phah ia ka sha ka Ministry, “kala iaid la palat shisnem mynta, ym shym la leh eiei halor kane ka kam”.
Ka KSU kala ong ba kam kwah ban khang slem ia ka jingthungkam haba khmih ia ka jingnang bun ki nongpang, hynrei kala kynnoh ia ka Sorkar namar ka “jingkular thok”.
“Kum ka seng, ngim kwah ban pynsangeh ia ka jingthungkam ha NEIGRIHMS namar ngi sngewthuh ba da ka jingnang bun ki nongpang….ka long kaba donkam ruh ban don kham bun ki nurse” ula ong.
Ka Seng kala kam ba kala ioh jingtip ba u Director ka NEIGRIHMS un sa rah ia ka jingtyrwa thungkam sha ka Governing Council khlem da pynrung ia ki jingai jingmut jong ka KSU.
“Lada ki pyniaid shakhmat ia ka jingthungkam kumba ka long….ngin sa iohi ia kham bun ki nurse shynrang ki ban wan ha NEIGRIHMS, baroh ki kam bala mang sha ki riewlum un sa shim noh da ki briew kiba wan na shabar ka Jylla” ula ong.
Ha ka shithi sha u Director, ka KSU kala pynpaw ba kan nym ailad ia ka jingialang jong ka Governing Council tad haduh ban da pynbeit ia ki jingdawa ka Seng.
 kala byrngem ban pynlong ia ka jingiakhih ba thymmai kynthup ki “sienjam kiba jur”, lada ka North Eastern Indira Gandhi Regional Institute of Health & Medical Sciences (NEIGRIHMS) ka pyniaid shakhmat bad ka jingthungkam khlem da pynbeit ia ki jingdawa halor ka bhah ki riewlum bad ka bhah ki nongtrei shynrang bad kynthei.){kind=link}