Shillong, Naitung 13 : Ka Tnad Pulit kala kem ia lai ngut ki rangbah bad laingut ki khynnah namar ka jingkynnoh byrngem ia ki nongtrei bad pynjulor ia ka “Oak’ homestay kaba don ha Risa Colony.
U Superintendent of Police ka East Khasi Hills Bah Vivek Syiem ula iathuh ba ki trai ka homestay kila ujor ia ak ejahar ha ka 11 tarik u Naitung.
“haba iadei bad ka jingjia kaba jia ha ka homestay ha Risa Colony ha ka kyrteng Oak, ngi la ioh pdiang ia ka jingujor ha ka 11 tarik Naitung ba arngut ki briew kila byrngem ban pynjulor ia ka guest house bad kila mih khlem da siew ia ka bailutksan” ong u Bah Vivek.
U pyntip ba ki Pulit kila register ia artylli ki case bad kila pan ia ka jingiatreilang bad ki Pulit ka Assam.
“Ban lapdien ia kine ki briew, ngi la iakren bad ki Pulit na Assam- SP Kokrajhar, SP Alipurduar bad ka kynhun na Sapatgram. Ha ka por 4:45 baje janmiet ngi la lap ia kine ki briew kiba la tip kyrteng u Vikas Singh, Avinash Singh, Akand Pratab Singh bad lain gut ki Khynnah kiba don kumba 17 snem ka rta” ula ong.
Ia kine ki briew la rah tian bishar ha Alipurduar bad hadien la pynlait noh da ka jamin.
“Hadien ka jingiohbat ia ki da ki Pulit ka Alipurduar, ka kynhun jong ngi nangne kala leit shatei bad kem ia ki bad la rah tian bishar ia ki hapoh ka Iingkashari u CGM ha Alipurduar. Hynrei, namar ki jingkynnoh ki dei kiba lah ban pynshitom tang hapoh ka hynniew snem, la ai jamin noh ia ki. Ia ki khynnah ruh la rah tian bishar hakhmat ka JJB” ong u bah Vivek.
U Bah Vivek u iathuh ba ia kine ki briew la pynngat hapoh ka kyndon BNS ba kynthup ia ka kyndon 351(3), 324(3) bad 3(5) jong ka BNS Act.
‘Watla kila ioh ia ka jamin, ngi la dep kem ia ki. Ka jingtohkit kan dang iaid ban pynthikna ba ngin chargesheet ia ki kham kloi kat kaba lah” ula bynrap.
