Shillong, Nailur 19: Ka KSU West Jaintia Hills District Unit kala byrngem ban pynhiar kput ia ki jaidbynriew Karbi lada ki Karbi kiba sah ha Block-I kim sangeh noh ia ka jingpyndik, byrngem byrsit bad pyntriem ia ki Khasi kiba shong ba sah ha Block-I.
“Ngi phah ia ka khubor kaba shai sha ki Karbi ba kin kein noh ka jingpyndik, ka jingbyrngem byrsit bad ban pyntriem ia ki paradoh parasnam jong ngi (Khasi) ba sah ha Block-I lem kumta ka KSU kan ym shu sngap shu peit hynrei ngin hap shim ia la ka jong ka lynti ba tyngeh” ong u samla Laiphar Syngkrem, President ka KSU-West Jaintia Hills haba iakren bad ki lad pathai khubor.
“Lada phi nang ban byrngem byrsit bad pyndik, ngi ruh ngi nang ban byrngem byrsit bad ban pyndik ia ki jaidbynriew jong phi bad phi ia tip ruh ba ki don ki paradoh parasnam jong phi kiba shong ki sah ha ka bri u Hynniewtrep” ula bynrap.
Kane ka jingbyrngem ka KSU kala mih halor ka jingioh lum khubor ba ki don ki kynhun ki Karbi ha Block-I kiba la thombor ia ki paid Khasi bad byrngem byrsit ruh lai phew jait.
Haba pynrem jur ia kane ka jing thombor, u Secretary ka KSU-WJH samla Lenning Grad Tariang ula ong “Kaba bun ka jingshah pyndik kadei ha ki pukit Assam kiba buh ktem ha ka thain, namar ki Khasi haba ki ot phlang ne dieng, kit maw ne shyiap ban shna iing ki hap siew khajna sha ki pulit Assam”.
Nalor kane, ula ong “Wat ki jhur ki jhep ne u kba uba ki kit na lum ruh ki hap siew khajna sha ki pulit bad wat haba ki leit iew leit hat ruh ki hap ban siew T.300 – T.400 kum ka bai iaid lynti sha ki pulit Assam bad ki Paid Khasi ki shah pyndik ruh haba ki leit iashimbynta ha kino kino ki jingialang”.
“Haba ki paidbah ki leit sha ki jingialang ha Khanduli ne Jowai, ki pulit Assam ki ju pyndik bad byrngem byrsit iaki nongialam shnong wat ban set ha along iaki” ong u Lenning.
Ka KSU kala dawa ia ka sorkar Jylla ba ka dei ban peit bha namar ki don 36 tylli ki shnong Khasi ha ka thain Block I bad ka jingpyndik jong ki Karbi ka jur bha.
“Ka jingpynthut ka dei eh namar ba ki kwah ban pynheh ia u pud u sam jong ki khamtam haba ki dang dawa iala ka jong ka jylla” ula ong.
Haba kylli, une u Nongialam ka KSU ula ong ba ki Pulit ka Jylla Meghalaya kim ju hiar satia sha ki Shnong Khasi ban ai ia ka jingpahara had dei kane kala pynioh lad ia ki Pulit Assam ne ki kynhun Karbi ba kin thombor ia ki Khasi.
“Ngi kyrpad iaka sorkar Meghalaya ba kan phah pahara iaki pulit ban ai jingiada ia ki Khasi, khamtam haba ki Karbi ki ju pynjulor iaki jingthung jingtep jong ki Khasi bad thang ruh iaki iing trep ki jong ki na ka por sha ka por” u la ong.
Ha kajuh ka por, ka KSU-WJH kala kyrpad ia ka JHADC ba kan ai sanad noh ia u Acting Dolloi jong ka Nabang Nongphyllut uba la shah jied ha ki paidbah khnang ba un khmih ia ki kam jong ka elaka.
