Shillong, Nailur 01: U chief executive member (CEM) ka Khasi Hills Autonomous District Council (KHADC) u bah Pyniaid Sing Syiem ula pyntip ba ka Executive Committee (EC) kala rai ban shim iaki sienjam ba tyngeh ba lah ban poi ruh sha ka jingkhang khyrdep lada ki Bank ki kyntait ban ithuh ia ki syrnot jong ka Council ba pynshisha ia ka hok longtrai ia ki jaka puta, lada ki paidbah ki kwah ban shim ram.
Ia kane u bah Pyniaid ula iathuh hadien ka jingialang hapdeng ki Bank ban iakren halor ka jingkyntait ki Bank ban airam ia ki paidbah watla kila pynbiang iaki kot bala ioh naka KHADC ban pynshisha iaka jinglong trai iaka khyndew ka shyiap ne ka jaka puta.
Lai tylli ki bank kila wan ban iashimbynta ha kane ka jingialang bala khot da u CEM bad kine ki kynthup ia ka SBI, HDFC, bad ka AXIS hynrei kiwei ki Bank kum ka MRB bad Bank of Baroda bad katto katne tylli ki Bank ki khlem wan shuh namar kila ithuh bad kla pyntreikam iaki kot ba ai ka KHADC ban pynshisha iaka jinglong trai iaka jaka.
Haba kren sha ki lad pathai khubor u bah Pyniaid ula iathuh baka EC kala bthah ia u Deputy Secretary ba khmih iaka tnat Land, ba un thoh sha baroh ki Bank ba kidei ban ithuh iaki kot ba ioh naka KHADC ban pynshisha iaka jinglong trai iaka jaka puta katkum ain Khasi Hills Autonomous District Regulation and Administration of Land Act 2021.
U bah Pyniaid ula iathuh ba ka ain katkum ka Section 8 clause 9, 10 ka kdew “Ka khyndew, ka dulir pynskhem, pata bad ki kot ki sla halor ka jinglong trai bala ai daka KHADC katkum ka Khasi Hills Autonomous District Regulation and Administration of Land Act 2021, kin dei ban ioh jingithuh bad kin dei ruh ki sakhi sabut halor ka jinglong trai iaka khyndew bad ia kine ki kot dei ruh ban ithuh da ki Bank bad kiwei ki Financial Institution”
“Naka liang ka KHADC kan ai iaki kot ynda ki nongaplai ram kila dep ban pynbiang iaki jingdonkam baroh bad ki Bank bad baroh ki Financial Institution kidei ban ithuh ia kita ki kot katkum ka Khasi Hills Autonomous District Regulation and Administration of Land Act 2021” ong u bah Pyniaid.
Haba kylli, u bah Pyniaid ula ong ba ki don ki Bank kiba la kham heh bad kiba don la ki jong ki Regional Area kum ka Ri-bhoi, West Khasi Hills, Jaintia Hills bad kane ka lah ban don ka jingbym ioh jingtip ki nongpyniaid jong kine ki Bank haba iadei bad ka jingdonbor ka KHADC ban ai iaki kot ki sla ban pynshisha iaka jinglong trai iaka jaka.
“Ka jingialang mynta ka sngi bad ki Bank ka long ka khubor sha baroh ki Bank baka KHADC ka don iaka bor haba iadei bad ka jingpynshisha iaka jinglongtrai iaka khyndew bad lada ki Bank ki dang kyngtait ban airam, ngim banse katkum ka ain Trading by Non-Tribal Act ngin hap ban khang ia kine ki Bank” ula ong.
