Shillong Nailar 02: Ka Jaintia Students’ Movement (JSM) kala byrngem ban shim da ki sienjam kiba tyngeh lada ka United People’s Front of Karbi Longri (UPFKL) ka pyndik ia ki jaidbynriew Pnar kiba shong basah ha ka thai Block-I.
Ha ka shithi kaba la phah sha u Myntri Rangbah ka jylla u Conrad K Sangma ha ka sngi Balang, u President ka JSM u Bah LS Rymbai ula ong, “Ngi kyntu jur ia phi ban shimkhia bad u Myntri Rangbah jong ka jylla Assam ban pynthikna ban ai ka jingiada kaba pura ia ki jaidbynriew Pnar kiba shong basah haBlock-I namar ka JSM kam don ia kano kano ka jingartatien ban pynphai kylla da kaba shim ia ki sienjam kiba tyngeh lada ka United People’s Front of Karbi Longri (UPFKL) ka dawa pisa ne pyndik ia ki Pnar ha Block-I.”
U Bah Rymbai ula pynpaw ba ki pulit Assam dang shen kila kem ia Arngut ki dkhot jongka UPFKL na West Karbi Anglong District bad ka don ka lad kaba jur bha ba kane ka kynhun kieng atiar kaba dang shu seng thymmai ka lah ban wan dawa pisa biang na ki jaidbynriew Pnar ha Block-I bad ban thombor ia ki ha kano kano ka rukom khnang ba ki jaidbynriew Pnar kin ym nud shuh ban pynsawa iaka jingthrang ka jong ki ban leitphai biang sha Meghalaya kumba la leh da ki kynhun kieng atiar barim jong ki Karbi.
Ula pynkynmaw ha u snem 1951 na ka bynta ban pynsuk ia ka kam ai jingshakri ia u paidbah, iaka Block-I & II kiba hap ha ka Jowai Civil Sub Division la pynhap ha ka United Mikir Hills, District da u Lat ka jylla Assam hynrie na ki daw ki bym lah ban tip, kam shim la don kano kano ka rai ban pynphai biang ia ka Block-I & II sha ka Meghalaya, haba kala ioh iala ka jong ka jylla ha u snem 1972.
“Naduh u 1951, ki jaidbynriew Pnar kila mad iaki jingeh bad jingshah thombor bad jingshah lehbeiñ ha ki bor kiba dei khmih ne ha ki kynhun kieng atiar jong ki Karbi bad kane kala pynlong iaki ban im ha ka jingim kaba eh bad jynjar bad kala pynkhlain iaka mynsiem ka jongki ban dawa ban wanphai biang sha ka jylla Meghalaya” ong u President ka JSM.
Ha u 2004, da ki spah ngut ki jaidbynriew Pnar kila phetwir na Sahsniang kaba hap hapoh jongka Laskein C&RD Block, West Jaintia Hills District namar ka jingsheptieng bad jingsyier ban duh iala ka jingim na ki kam pyntreim jong ki kynhun kieng atiar ki Karbi kiba wan ban thombor, pyndik, dawa pisa bad ban pyniap ia ki Pnar tang na i daw barit barai, la pynkut u Bah Rymbai.
Pule lang ia kane: “Ngi siew thikna ia ka bai bording balei ngim ioh bording tikna”, sawa jam ka sur ha ka Rally ka KSU
Peit lang ia kane
