Duh jingkyrmen ban pyntrei ïa ki kam pynroi
Nongpoh, Nailur 06: Ka Dorbar Shnong Mawpun Kshaid, kaba hap ha ka Bhoirymbong C&RD block mynta ka sngi ka la byrngem ban kiew noh sha Secretariat ban dawa ia ka Sorkar Jylla ba kan pyllait noh ia ka song pisa bai mar (material) jong ka skhim MGNREGS, kaba la buh ia ka Shnong ha ka jingeh ban trei pyndep ia ki kam pynroi bala mang na ka skhim.
Kane ka Dorbar Shnong kala pynpaw ruh ia ka jingduh jingkyrmen ban pyntrei ia ki kam pynroi ha ka shnong ka thaw kaba wan na kane ka skhim jong ka sorkar pdeng namar ka jingbym shimkhia jong ka Sorkar ban pyllait ia ka pisa kaba dei hok ban poi sha ki shnong ki thaw.
Ia kane la iathuh da u Bah Bandari Ryntathiang Rangbah Shnong ka Mawpun Kshaid uba dei ruh u President ka Confederation of Ri Bhoi People (CoRP), Sengkmie.
“Naduh ba shimkhia kane ka sorkar mynta bad ka sorkar BJP ha Delhi, ka jingpyntrei ia ki kam pynroi lyngba ka MGNREGS kila sahkut bad sahteng ha kiba bun ki shnong kiba hap hapoh ka Bhoirymbong C&RD Block” ula ong.
Kat kum ka jingong jong u, ki Shnong ki Thaw kila ioh shibun bah ki jingmyntoi ha kine ki snem bala leit noh, kiba pynsuk ia u paid nongshongshnong namar ki kam pynroi jong kane ka skhim. “Ngim ju mad jingeh hashuwa kine ki san snem ba la leit noh hynrei mynta kane ka skhim kala thud bad buh jingeh ia ki Shnong ban pyndep ia kiba bun ki kam. Ka daw hi ka dei namar ka jingbym pyllait pisa da ki bor Sorkar” ula ong.
Ha kajuh ka por, une u Nongialam Shnong ula buh jingkylli ruh ia ka Sorkar Jylla halor ka jingbym lah ban siew ia ka pisa bai bylla jong ki briew ba don job card haba dawa ia u BDO ba u dei ban batai balei ym lah ban pyntreibha ia kane ka skhim hapoh ka Block.
Une u Nongialam Shnong u pyntip ba shen un sa lum ïa baroh ki Rangbah Shnong bad ki paidbah nongshong shnong ban leit dawa syndon na Secretariat ïa ka pisa kaba dei halor ka jingsiew ïa ka bai tiar bai tar jong ka skhim MGNREGS.
