Shillong, Jylliew 24: Ka synjuk ki Doktor Sorkar ka Jylla- ka Meghalaya Medical Service Association (MMDA) kala byrngem ban iakhih halor ka jing mutlop ka Sorkar ban tohkit ia ki kam jong ki Heh ka Indian Institute of Public Health (IIPH) Shillong ba jia ha ka 27 tarik, Jymmang bad ruh ia ki jingkynnoh pyrshah ia u DHS(MI)Dr Aman War kaba pynjah burom bad ba pynhiar kyrdan ym tang ia une u Khlieh ka Tnad hynrei ia ki Doktor ka Jylla baroh kawei.
“Namar ka Sorkar kam shym la jubab ia ka dorkhas jong ka MMSA bala aiti ha ka 1 tarik Jylliew, ka State Executive Committee ba iakynduh hynne ka 24 tarik Jylliew, kala rai ban pynlong noh da ka jingiakhih ban sa pyntip kham hadien” ong ka shithi ba la phah da u Dr R Pohsnem sha u Secretary ka Tnad ka Koit ka Khiah ka Jylla.
Kat kum kane ka shithi, ka MMSA kala pynpaw ba kam don lynti pat da kumwei ia kane ka jingmutlop jong ka Sorkar Jylla halor ki jingdawa ka synjuk.
Lah ioh jingtip ba MMSA kan sa pynbna noh ia ki jingiakhih ha ka sngi nyngkong ban wan kata ha ka 27 tarik lada ka Sorkar kam leh eiei halor ki jingdawa jong ka synjuk.
Ka MMSA kala kyrshan ia u DHS(MI) halor ka jingjia ba jia ha ka 27 tarik Jymmang, halor ka jingleit jong u ban tuklar ia ka jingpyndonkam be-ain jong ka IIPH, Shillong ia ka Campus barim ka NIFT ha Pastuer Hills kaba la aiti da ka Tnad ka Koit ka Khiah ban pyndonkam da ka Meghalaya AIDS Control Society (MACS).
U DHS(MI) ula leit ban tuklar ia kane ka kam hadien ka jingioh pdiang ia ka jingujor na I Project Director bad Deputy Director ka MACS, kiba la pyntip ia ka jingshah kren tohmet bad jingshah kren khor ha u Registrar jong ka IIPH uba la pynpait jubor ia ki tala jong ki kamra bala ai ban pyndonkam da ka MACS.
Ka MMSA kala pynrem jur ia ka rukom pynwan dur ia kane ka jingjia da ki Heh ka IIPH kiba la kynnoh lyngba ki lad pathai khubor ia u DHS(MI) ba ula wan ban pynibor bad kren tohmet pyrshah ia ki haba ong “ “U DHS(MI) Dr Aman War ula shakri hok la 33 snem ha ki jaka nongkyndong bad jaka sor ka Jylla ha ki kyrdan bapher bapher tad haduh ba un da poi haduh ka kyrdan Director bad barabor u dei ruh uba khmih bad buh hakhmat ïa ka bha ka miat ki doktor”.
Ka MMSA ka ong ‘Ngi tip ba ka IIPH Shillong Campus ka dei ka ba lah seng ban pynkhlain ïa ki lad ai jingsumar hapoh ka Jylla bad ha ka thain Shatei Lam Mihngi ka Ri, hynrei ka rukom leh jong u Registrar bad ka Director ka IIPH ba pynhiar kyrdan ïa u DHS (MI) kata ruh ha ki kot khubor ka la ktah ïa ka burom jong ki doktor ka Sorkar Jylla bad kane kan nang pyntroin ïa ki lad ai jingsumar kaba long pyrshah ïa kaba ka IIPH ka ieng”.
Ha kajuh ka por, ka MMSA kala dawa ïa ka Sorkar Jylla ban khyllie bad bishar biang ïa ka Memorandum of Understanding ba la ïasoi hapdeng ka Sorkar Meghalaya bad ka Public Health Foundation of India (PHFI).
Ka MMSA ka pynpaw ïa ka jingkyndit ba kumno u Principal Secretary ka Tnad ka Koit ka Khiah Sampath Kumar ula shah liang sha ka IIPH Shillong Campus, kaba dei ka institution shimet ha ka jaka ban ïada ïa u DHS(MI) uba khmih ïa ka bha ka miat jong baroh ki Ophisar bad ki jaka sumar ha Jylla bad khlem da ailad ïa u ban ïathuh ïa kaei kaba jia ia i Project Director bad Deputy Director ka MACS.
” Ka MMSA ka dawa ba ka Sorkar ka dei ban tohkit ïa ki kam jong kine ki Heh ka IIPH halor ka jingjia ba jia ha ka 27 tarik Jymmang bad ka jingkynthoh pynthohbrïa ïa u DHS(MI)” ong ka MMSA.
Ka MMSA ka la dawa ruh ïa ka Sorkar ban shimkhia ïa ka jingdawa jong ka Association ba ïadei bad ka jingai pyndonkam ïa ka campus barim ka NIFT haba bynrap ba dei ban kyndang noh ïa ka ophis jong IIPH, Shillong Campus na ka kamra ba la ai sha ka hapoh ka ophis jong ka Deputy Director Malaria, kaba la khapngiah lupa.
” Ka IIPH, Shillong Campus, ka la dei ban don la ka jong ka Ophis building namar ïa ka MoU la dep ïasoi hapdeng ka Sorkar Jylla bad ka PHFI naduh u snem 2008” kala ong.
