Nongpoh, Naitung 05 : Ka Joint Action Committee of All Ri-bhoi Passenger vehicle (JAC-ARPV), hynne ka sngi Balang, kala byrngem ban pynlong noh da ka jingiakhih ba pynslem ka Sorkar ban siew ia ka pisa bai pyndonkam ia ki kali ha ka por Elekshon bad khlam Covid-19 haba aipor ruh 7 sngi ba kan siew pyndep lut ia baroh.
Ka JAC-ARPV kala buh ia kane ka jingaipor hakhmat u Deputy Commissioner ka Ri-Bhoi District Arpit Upadhyaya, kaba dei ruh ha ka sien kaba ar ba ka kynhun kala dawa iala ka jong ka hok na une u Khliehduh ka District.
Haba iakren bad ki lad pathai khubor, u Chairman ka JAC Bah Bines Makri ula pynpaw ia ka jingbitar halor ka jingleh bym suid niew jong ka Ophis u DC ban siew ia ka hok jong ki nongniah kali kamai kiba la pynlut por miet la bad sngi ha ki por iakhun ia ka khlam Covid-19 bad por elekshon.
“Kane ka dei ka sien kaba ar ba ngi la wan iakren bad u Deputy Commissioner” ula ong haba iathuh ba ha ka sien ba nyng kong kata ha ka 16 tarik Jymmang, u Deputy Commissioner ula kular ban sa siew pynkhuid noh ia baroh ki jingsiew tang hapoh 15-20 sngi hynrei kane ka jingkular ka dei kaba shu lamler.
U Secretary ka JAC Bah Vincent Sohkhwai ula ong “Ha ka por ba ka Ophis u DC ka donkam ban bat ia ki kali, ka da byrngem ba lada ngim treh ban leit duty Sorkar kin pynduh noh ia ki licence bad ki kot ki sla kali hynrei sngewsih ba ynda la dep ka kam, kila leh bym patiaw pat ia ka jingsiew ba dei hok ba ngin ioh”.
“Ngin aipor sa 7 sngi ia ka Ophis u DC ba kan siew khuid noh ia baroh ka bai kali jong ngi lem kumta ka JAC-ARPV kala rai ban pynlong noh da ka jingiakhih ban ioh iala ka jong ka hok” ula bynrap.
Pule lang ia kane: Manipur: Hadien 2 bnai duna, la plie biang ia ki skul naduh klas 1 haduh klas 8
