Shillong, Nailar 13: U Myntri Khynnah ka Jal Shakti bad Tribal Affairs Bishweswar Tudu hynne ka sngi saitjain ula pynpaw ia ka jingbynniaw halor ka jingpyntreikam ia ki skhim bapher bapher ka Sorkar Pdeng ha Jylla Meghalaya.
“Lada peit ia ki kot ki sla hi nga kmen hynrei ha ka jingpyntreikam pat ngam kmen satia” ong Tudu haba iakren bad ki lad pathai khubor bala pynlong ha ka Ophis jong ka BJP hynne ka sngi saitjain.
Kat kum ka jingong jong u, ka Jylla Meghalaya kala lah ban kynjoh tang 30-40 % ha ka jingpynyntreikam ia ki skhim ka Sorkar Pdeng haba ong “Ngi la ai jingmut ia ka Jylla ban pyndep ia ka kam kat kum ka por ba ngi la buh”.
U Myntri Khynnah ula wan iuhkjat arsngi ha Jylla ban shong bishar ia ka jingpyntreikam ia ki skhim ka Sorkar Pdeng ha ka Jylla.
Ha ka sngi thohdieng, u Myntri ula mih naka jingialang hadien ba ki Ophisar ka Jylla kim shym la rah ia ki kot ki sla ban shong bishar halor ka jingpyntreikam ia ka Jal Jeevan Mission bad kiwei kiwei ki skhim ka Sorkar Pdeng ha Jylla.
Une u Myntri Khynnah ula bthah ia ki bor Sorkar ba kin shimkhia ruh ia ki jingkyrpad jong ki nongialam jong kiwei ki seng sain pyrthei haba pyntreikam ia ki skhim ka sorkar pdeng.
“Kane kala mih halor ki jing kynnoh ba tang ki jingtyrwa jong ki Nongmihkmat jogn seng sain pyrthei ba don ha ka Liang Pysshah kila shah khein kongsan katba kiwe pat ym shym la khein snep satia. Kumta la bthah, ai jingmut bad kyrpad ban sngap ruh ia kiwei ki nongmihkhmat jong ki wei pat ki seng ki bym don ha ka liang synshar” ula ong.
Halor ka jingtreikam ki Ekalavya Model Residential Schools (EMRS) bala bei tyngka da ka Ministry of Tribal Affairs, u Tudu ula ong ba ki don ki proect kiba dang don hapoh ka jingpyntrei bad ba dang sah ban pyndep bad kin don ruh kiba dang hap ban khot tender.
“Ngi la bthah ban pyndep ia ka EMRS hashwa u 2024” ula ong haba bynrap “Kane ka dei ka kamram jong ka Sorkar Jylla ban sdang mardor. Ynda nga poi ha Delhi, ngan sa iakren ban pynthikna ba ki kam ki sdang treikam noh mardor”.
U Myntri Khynnah ula ban jur ruh halor ka jingdonkam ban pynkhie im bad pynneh pynsah ia ki Wah bad ki tyllong um kiba don ha Jylla ban lah tehlakam ia ka jingkyrduh um ha Jylla.
U Tudu ula leit jngoh ruh ia ka Treatment Plant ha Mawphlang bad ong ba u shem ba ka dei kaba biang namar kam shym la don ka jingujor ba ki paidbah kim shym la ioh ia ka umbam umdih kaba khuid.
Halor ka jingpynskem ban pyndep ia ka Greater Shillong Water Supply Scheme (GSWSS) Phase-III, u Myntri Khynnah ula kubur ba ula iohi ia ki pipe um rong blue kiba la shu buh harud surok ha kylleng ki jaka katba u dang iaid lynti sha Mawphlang.
U Myntri ula ong ba lada ym lah ban pyndep ia kane ka project hapoh ka por bala buh, ka sorkar pdeng kan sa leh ia kaei kaba donkam . “Nga la dep kren sha ki ba lada kim lah pyndep kin sa ngat ha ka kuna” ula ong.
