Shillong, Iaiong 12: U Chief Electoral Officer (CEO) Dr BDR Tiwari hynne ka sngi Thohdieng, ula pynpaw ba ki jingjia ha kine ki khyndiat sngi ki dei ki bym ju jia koit ha ka por elekshon ha ka jylla hynrei ula ong pat ba ka Election Commission ka iengskhem ha kaban pynthikna ba ka elekshon MP Lok Sabha kan long kaba laitluid, kaba khuid ba suba bad kaba jai jai.
Hadien ba la dep ban lum ia ka jingialang bad ki nongialam na ki seng saiñ pyrthei, u Dr Tiwari ula ong ba kila don ki jingsngewkhia kiba la pynpaw da ki seng saiñ pyrthei.
“Ngi la iohsngew lut ia baroh ki jingsngewkhia bad jingkhuslai halor ka jinglong jingman kaba mynta bad ngi la kyntu ia ki (seng saiñ pyrthei) ba kin ai ka jingtreilang kaba pura bad baroh kila ai ia ka jingpynthikna ba kin pyrshang katba lah ban pynneh iaka shongsuk shongsaiñ bad ha kajuh ka por ban ai ka jingiatreilang bad ki bor aiñ ha ka jylla” la ong u CEO.
Ula ong, ba ki don ka jingsngewkhia ha kaba iadei bad ka jingpynneh ia ka shongsuk shongsaiñ ha kane ka elekshon ban wan bad ka EC ka dang peit bniah bha halor kane ka bynta.
“Ngi la peitngor bha bad ngi iengskhem ryngkat ka jingkitkhlieh ban pynlong ia ka elekshon kaba laitluid, kaba khuid kaba suba kaba jai jai” ula ong.
Ha kaba iadei bad ka jingpynkheiñ ia ka Model Code of Conduct, u CEO ula pyntip ba la dep ban ai Show Cause Notice ia ki katto katne ngut ki nongialam bad nalor kane ki kynhun kiba kynthup ia ka Flying Squad bad ki Pulit ki don ha ki lyngkha treikam bad la ring video ruh ia baroh ki jingialang jong ki seng saiñ pyrthei bad la pynjur ruh ia ka jingpahara ban pynneh ia ka shongsuk shongsaiñ bad ban tehlakam ban ym mih kino kino ki jingjia ki bym sngewtynnad.
Ula ong, ba ka Election Commission kala khmih bad peitngor bniah bha ia ki Social Media bad lada ka ioh jingtip eiei kan leh mardor ia kaba donkam.
U CEO ula pyntip ruh ba la dep ban ithuh ia palat 400 tylli ki jaka thep vote kum ki jaka kiba don jingma ne kiba lah ban mih ka huri hura.
“Ngi lah dep ban pynkhreh ia baroh ki jngdonkam na ka bynta kitei ki jaka thep vote. Baroh ki bor kiba dei khmih kila dep pynlong ia ka jingkhmih bniah kaba thikna. Ha ki jaka kiba don ka jingiakhleh ha ka shong ka sah ki jaidbynriew bapher, ngi la shimkhia bha ban kiar ba kan ym mih kano kano ka jingjia kaban lam sha ka jingiakynad” ong u Tiwari.
Nalor kane, ula pyntip ba ki paidbha kila mih shakhmat ha kaban iashimbynta ha ka jingthep vote na ka iing kaba ki shong ki sah bad lyngba ka Postal Ballot.
 Dr BDR Tiwari hynne ka sngi Thohdieng, ula pynpaw ba ki jingjia ha kine ki khyndiat sngi ki dei ki bym ju jia koit ha ka por elekshon ha ka jylla hynrei ula ong pat ba ka Election Commission ka iengskhem ha kaban pynthikna ba ka elekshon MP Lok Sabha kan long kaba laitluid, kaba khuid ba suba bad kaba jai jai.){kind=link}