Nongstoiñ, Risaw 3: Ki kynhun Sengbhalang kiba dawa pyntreikam ia ka Ain ban khang ia ka jingrung kyrthep ki bar Jylla sha Jylla, kila pynpaw ia ka jingbynniaw kaba jur halor ka jingsahteng ban pynieng ia ka khyrdop ‘Entry/Exit Point’ ha Athiabari kaba la jan kynjoh mynta ia palat san snem naduh ba ioh ia ka jaka.
Kane ka rai ban pynieng khyrdop talasi bar Jylla jong ka Sorkar kala mih hadien ba ka sorkar Jylla hapoh ka jing synshar ka Meghalaya United Alliance-II (MUA=II) ba ialam da u Dr Mukul Sangma, kala mynjur ia ka Ain Meghalaya Resident Safety & Security Act ha u snem 2016.
Ka Sorkar Jylla kala mynjur ia kane ka Ain hadien ka jingpynbor jong ki kynhun Sengbhalang kiba la pynlong ia ki jingiakhih ban dawa pyntreikam ia ka Inner Line Permit (ILP).
Ka Athiabari ka dei ka lynti bah kaba ki mynder ki ju pyndonkam ban rung hapoh ka jylla. Ki dkhot nongialam jong ka seng, ki lap ba ki don ki mynder ri kiba wan naduh Nepal ne Bangladesh lyngba ka Assam, ban wan trei bylla treikam dewiong ha ka thaiñ Shallang bad ha kiwei kiwei ki jaka.
Ka Sorkar Jylla kala jied ia ka Athiabari hadien ka Public hearing ba la pynlong ha ka 24 tarik Lber 2017, ha ka jingdon ryngkat jong u Bah M.B.Tongper EAC Mawshynrut block, ki sordar, ki nokma, ki dkhot na ka tnad revenue Nongstoiñ, ka Social Impact Assessment team (SIA) na ka Meghalaya Institute of Governance ha ryngkat ki trai khyndew, ki seng longkmie bad u sirdar jong ka Hima Jyrngam.
Ka jaka ba thmu buh ïa katei ka khyrdop ka dei ka khyndew ba la kam trai da ka District Council ha ka jingheh kaba 28728.88 square meters. Na ka liang ka District council ruh katkum ka shithi No.DC.RAF/ XII/406/2015/5349 kaba Dated Shillong, the 6th September 2016 lyngba u joint secretary to the Executive Committee Khasi Hills Autonomous District Council Shillong, ka la mynjur ban ai ïa katei ka jaka sha ka sorkar jylla ban tei ïa ka khyrdop talasi mynder ha Athiabari. Sngewsih pat ba haduh mynta ym pat I don dak ei ei ruh em ba ka sorkar kan sdang noh ïa katei ka kam.
Ka Sorkar Jylla kala dep ban haduh 97 lak tyngka ka dor jong kane ka heh kaba ka ingheh ka long 8 akar tam jong ka Khasi Hills Autonomous District Council bad uphah ruh ia ka Plan bad Estimate sha ka tnad P.W.D Building ba kan leh ia kaba donkam.
Ka jingsuki jong ka sorkar ban tei ïa katei ka khyrdop talasi mynder ha katei ka jaka ka la pynlyngngoh haduh katta katta ym tang ïa ki sengbalang, hynrei wat ïa ki paidbah nongshong shnong jong ka District baroh kawei.
Na ka liang ki nongïalam jong ki sengbhalang bad ki paidbah ka District ki la kyntu ïa ka sorkar ba ka dei ban pyntreikam noh kloi ïa katei ka jingthmu, khnang ba ki paidbah kin ym sah ha ka lyngngoh.
Kumban shu pynkynmaw, ka KSU Mawshynrut Circle ka la kyntur na ka por sha ka por bad pynkynmaw ïa ka sorkar jylla ba ka dei ban tei noh ïa ka khyrdop talasi mynder ha Athiabari ba hap hapoh Mawshynrut Civil Sub Division, West Khasi Hills.
Ki nongïalam jong ka seng ki la pynpaw ba ka long kaba la donkam kyrkieh ban buh noh ïa ka Entry & Exit Point ha katei ka jaka, ban teh lakam ïa ka jingrung lait lan jong ki mynder hapoh ka jylla.
Ki paidbah ka thaiñ ki da thrang haduh katta katta ban pynkloi noh ban tei ïa katei ka khyrdop, namar ka long shibynta ban wanrah ïa ka roi ka par bad ki khmih lynti ba ki samla ka thaiñ kin ïohkam lyngba katei ka project bad ban wanrah ruh ka jingshngaiñ ïa ka thaiñ bad ka Jaidbynriew hi baroh kawei.
