Nongstoin, Nailar 28: Ka West Khasi Students Union (WSU) kala pynpaw ia ka jingbynniaw kaba jur baka Sorkar Jylla kala shu ieh bad buhteng ban pyndep ia ka Polytechnic ha West Khasi Hills kaba la iaid mynta la saw snem tam.
Kane ka Seng kala pynpaw ia kane hadien ka jingjurip ia kane ka jingtei jong ka Sorkar hynnin ka sngi, kaba la sdang ban pyntrei naduh u snem 2018 ha ka shnong Mawrusyiar, Nongstoin.
“Ha ka jingjurip ngi la shem ba ka jingtrei ka dang sah ryngheng bad sangeh noh khlem pat lah ban pyndep haduh mynta mynne” ong ki Nongialam ka WKSU.
Ha ka jingwad bniah kashem news, la lap ba ka daw ba pynlong ia u Contractor ban sangeh noh ia ka jingtrei ka dei namar ka jingbym lah jong ka Sorkar ban pyllait ia ka bill.
“Ngi bynniaw jur baka Sorkar kam lah ban pyndep ia kane ka jingtei. Kane kala pynlong ia ki samla pule ban mih leit wad ia ka jingpule shabar jong ka District” ong u Education Secretary ka WKSU samla L Khardewsaw uba la kyrpad ia ka Sorkar ba kan shimkhia noh ha kaban pyndep kyrkieh ia kane ka jaka pule.
Ha kane ka sngi, ka WKHSU kala leit ruh ban jurip ia ka jingtei jong ka ITI ha Nongstoin kaba don ha ka shnong Sohpian, kaba la mang haduh shi klur tam.
Kat kum ka jingong jong u, ka ITI kala ai ka jingshakri la bun snem ha District hynrei kane ka shnat treikam kala ai pat ia ka jingshakri sha ki samla da kaba shu pyndonkam ia ka ïing wai wat haduh mynta mynne.
“Ka Seng kala pynioh ia ka jaka lyngba ka jingpynsngew jong ka Directorate of Employment and Craftmen Training ha ka shnong Sohpian bad mynta ka jingtrei kala iaid shaid shaid” ula ong.
Une u Nongialam ka WKSU ula ong ba ka jingjurip jong ka Seng ia kane ka jingtei jong ka ITI ka long eh ban peit la ka rukom trei ïa katei ka building ka long ne em katkum ka plan ne kyndon ba la buh. U la pynkynmaw ruh ba I contractor ba dei ban trei I dei ban trei bha bad bud ryntih ïa ki kyndon ne ka plan, khnang ba kan ai ka jinghun bad jingshngaiñ ban pyndonkam ïa ka hadien ba la dep.
La pynkynmaw ba katei ka shlem ka don bun ki bynta jong ka jingpyntbit ba ki samla ki kwah kum ka fitter, plumber, wireman ban kiwei kiwei.
Ka seng ka pynpaw ruh ka jingkyrmen ba yn ym slem shuh ba ka ITI kan sa ïoh noh la ka permanent building. Ka seng kan sa buddien ïa ki jingpyntrei ïa ki government building ha ka thaiñ, ba kin ai jinghun bad lada shem ba ka jingtrei ïa ki building kim ai jinghun, ka seng ka hap ban shim da kiwei ki rukom pyrkhat la bynrap u education secretary L. Khardewsaw.
La pynkynmaw ruh ba lada ki jingtrei ïa ki building bapher bapher ha ka thaiñ kim long kiba ïaid beit, ka seng kam banse ka hap ban shim da kiwei ki sien jam ban buddien, ong une u Nongialam ka WKSU.
