Shillong Naitung 29: U State President ka Trinamool Congress Meghalaya bah Charles Pyngrope hynne ka sngi Saitjain, ula ong ba ym dei satia ban shu kynnoh ia ki seng sain pyrthei ba ki dei kiba donkti ban kynshoit ia ki paidbah ban thaw jingkulmar ha ka jingiakynduh jong u myntri rangbah ka Jylla u Conrad K Sangma ia ki kynhun bapher bapher ha nongbah Tura ha ka 24 tarik mynta u bnai.
Ha ba kren bad ki lad pathai khubor u bah Charles ula ong ruh ba watla ki Pulit ki la kem ia ki briew kiba donkti ban thaw ia ki jingkulmar katkum ki sakhi sabut hynrei ha kajuh ka por u la ong pat ba ym dei ban pynlong politik ia kane ka jingjia da kaba shu teipop ia ki seng sain pyrthei.
“Ki briew kiba la shai kim dei ban long kum ki riew khlaw khamtam ka jingthmu ban pynmynsaw kat ia u Myntri Rangbah ka jylla ne iano iano ruh bad ka jingjia haka 24 tarik Naitung kala pynjah burom ia ka imlang sahlang bad ka jylla baroh kawei” la ong u bah Charles.
U bah Charles haba pynrem jur ia ka jingleh riewkhlaw jong ki briew kiba thmu ban pynmynsaw ia u Myntri Rangbah, ula ong “Ka TMC ruh ka kwah ban tip ia ka jingshisha mano ba leh ia kane, hynrei ym dei ban shu kynnoh ba donkti ki seng sain Pyrthei kum ka TMC ne ka BJP ne kino kino”.
Pule ruh: Conrad : Kloi ka Sorkar ban iatreilang bad ki College ban lah pyntreikam noh ia ka NEP 2020
