Shillong, Jymmang 03 : Ka North East Student’s Organisation (NESO) kala pynpaw ia ka jingbynniaw kaba jur halor ka jing kyndang jong ka Sorkar Manipur ia ki jaidbynriew Zo bad kumjuh ruh ia ki Khasi na ki shnong ba ki sah ha ka nam ba ki shong ki sah ha ki khlaw reserve jong ka Jylla.
“Ka NESO lyngba kane ka kyrwoh ka pynpaw ia ka jingsngewkhia halor ka jingjia ba dang shen ha Manipur ha kaba ka Sorkar Manipur kala kyndang ia ki paid riewlum ka Jylla kiba dei ki Jaidbynriew Zo bad ki jingkulmar kiba mih hadien kane” ong ka kyrwoh na u Chairman ka NESO Bah Samuel B Jyrwa bad Secretary General Mutsikhyo Thobo.
Ka NESO kala ong ba la kyndang ia kine ki paid riewlum ha ka nam ba ki shong ki sah ha ki khlaw Reserve hynrei ka jingshisha pat ka long ba kine ki nongshongshnong kila shong la sah ha kane ka jaka da ki phew phew snem.
Kumjuh ruh ka NESO kala pynkynmaw ba ha u bnai bala lah, ka Sorkar Manipur kala pyrshang ban kyndang ia ki Jaidbynriew Khasi kiba shong shnong ha ka thain, kiba la shong shnong ha kane ka jaka naduh kulong kumah.
“Ka Sorkar Manipur kan hap ban pdiang ba kine ki dei ki jaidbynriew riewlum jong ka thain Shatei Lam Mihngi bad ki la shong la sah ha kine ki jaka naduh ka por ki longshuwa manshuwa bad ba kim dei satia ki poiwir na Nepal lane Bangladesh” ong ka NESO.
Ka NESO kala khot ia ka seng All Manipur Students Union (AMSU) bad ka Mizo Zirlai Pawl (MZP) ba kin shim ia ka sienjam bad ban iatreilang hapdeng jong ki khnang ba kan wanrah ia ka jingjai jai bad ban tehlakam ia kano kano ka jingkyn-ad pher jaidbynriew.
Ha kajuh ka por, ka NESO kala wer ia baroh ki jaidbynriew riewlum ba kin pynneh ia ka jingshongsuk bad ban burom ia ka jingiadei kaba la iatei naduh ki pateng la pateng.
