Shillong, Nailur 13: U Myntri Sorkar ba khmih ia ka tnad Food & Civil Supplies Bah Comingone Ymbon, hynne ka sngi ula kynthoh pyrshah ia ka jingiakhih jong ka Voice of the People Party (VPP) halor ka jingkiew dor jong ki marbam mardih ha ka jylla, da kaba ong ba kadei tang ka buit ban myntoi ka VPP ha ka kam sain pyrthei.
Ula pynshai ruh ba ka jingkiew dor ka dei namar ka jingeh ha ka jingpynpoi iaki marbam, ki jingduna ha ki jingtei bad ki jingjia ba shabar u pud ba lah ban leh eiei kum ka jingkylla ka suinbneng, hynrei kam don satia, kano kano ka jingpyniaid bakla jong ka sorkar jylla.
Haba iakren bad ki Ladpathai khubor, u Bah Comingone Ymbon ula batai ba ka jylla
Meghalaya ka shaniah tylli ha ka jingwanrah ia ki marbam mardih kiba kongsan nabar, namar ka jylla kam dei ka jylla kaba pynmih bun ia ki jhur ne ka doh. Kane ka jingshaniah ka pynkiew ia ka dor ka mur.
“Ngi ha Meghalaya ngi shaniah ha ki jylla kum ka Maharashtra bad Bihar na ka bynta u piat” ong u Bah Comingone haba bynrap “Ka jingbym don ki lynti rel bad ka jingshaniah tylli ha ka leit ka wan da ki kali, kala pynkiew ia ka jinglut jingsep ha ka kit ka bah bad kane ruh ka lam sha ka jingkiew dor.”
Ula ong, ba kawei ka dawbah kaba ktah ia ka dor ka dei namar ka jingdon jong ka jingkhang kaba dang shen ia ki kali heh kiba kit palat ia ka 4 metric ton ban iaid lyngba ka jingkieng Umiam. Ki trok kiba kit ïa ki jhur bad kiwei kiwei ki mar kiba kongsan na Assam mynta ki hap ban ïaid da ka lynti kaba kham jngai lyngba ka Mawryngkneng, kaba pynkiew ïa ka bai kit na ka T.100 sha ka T.200 ban pynpoi ia ki marbam sha Shillong bad kane ka jingeh kala pynlong ban don ka jingkiew dor ha ka jylla.
U Myntri Sorkar ula kdew ruh ba ka jingbym don lynti rel ha kiba bun ki bynta ha Meghalaya kala nang pynsniew shuh shuh ïa ka jinglong jingman bad ula ai nuksa ba ka lynti rel ha Mendipathar ha rilum Garo ka lah ban pynhiar ia ka dor.
“Ha Rilum Garo, ngi don ia ka lynti rel, u khaw u kham tad dor haduh T.13 haba ianujor bad ka nongbah Shillong, kaba ngi shaniah ha ka jingkit jingbah da ki kali,” ula batai.
Haba pynpaw ia ka jingsngewkhia halor ka jingiapher ka dor hapdeng ka Meghalaya bad kiwei ki jylla, u Myntri Sorkar ula ong, ba ka jingiapher kam da long kaba jur kumba kam kiba kynthoh.
“Ngi don ia ki jingtip. Nga thrai ha kiwei pat ki jylla, ka dor ka mur, ka jan ia long mar kumjuh hi. Lehse ka jingiapher ka long tang 50 haduh 100 percent, hynrei kata ka long ia ki jhur ki jhep. Kam don than kano kano ka jingiapher kaba khraw ha kaba iadei pat bad kiwei ki mar kiba kongsan,” la pynshai u Myntri Sorkar.
Halor ki jingkynnoh ba don ka jingpynkylla ia ka dor ka mur, u Bah Comingone ula pynthikna ia ki paidbah ba ka sorkar jylla kala buh ia ka Price Monitoring System kaban pyrkhing ia ka dor jong ki marbam mardih kiba kongsan.
“Ka dor ka lah ban iapher khyndiat ha ki shnpng bapher bapher. Nuksa, ki iew dielang kum ka Iewduh ki don ka dor kaba kham duna haba ianujor bad ki dukan kibadie khutia. Hynrei baroh ki dukan ki dei ban pyni ia ka dor ka mur ha ki sleit bad ka Price Monitoring System ka pynthikna ba kam don ka jingpyni ia ki dor ne ka jingdie tuh” ong u Bah Comingone.
U Myntri Sorkar ula pynksan ruh ba ka tnad jongu ryngkat bad ki District Commissioner ki dang peitngor bha ia kane ka jinglong jingman. “Katkum ka jingtip na ka tnad bad baroh ki District Commissioner, ki trei bha man la ka sngi ia ka kam. Ka dor ka long kaba biang bad na ka sorkar, ngi pyrshang ban trei shitom ” ula ong bad ka bynrap, “ngi la dep 442 tylli ki jingleit jurip bniah ha u snem 2024 bad ka sorkar ka dang long kaba peitngor ha kaba khanglad ïa ka jingdie tuh ne ban jingpynkylla ia ka dor.
Ula iathuh ba la buh ia ka ‘Dashboard’ ban khmih bniah ia ka dor jong ki marbam kiba kongsan ha kylleng ki jylla bapher bapher, ia kaba ym donkam ban phah briew ban leit peit ia ka dor jong ki marbam. Ia katei ka Dashboard la la thaw da ka Ministry ban peitngor ia ki dor ki mur jong ki marbam kiba kongsan ha man la ki jylla. La pyndonkam ia katei ka rukom treikam ban ianujor ia ki dor ki jong ngibad ki jylla kibamarjan bad ban pynthikna ba kan long kaba khuid bad shai kdar.
U Bah Comingone Ymbon ula pynthikna ïa ki paidbah, ba ka sorkar ka leh lut ia kat kaba donkam ban pynbeit ïa ki dor bad ban ïada ïa ki nongthied na ka jingkiew dor kaba khlem nongrim, wat hapdeng ka jingmad ka jylla ia ki jingeh bapher bapher.
Katba na ka liang jong u Commissioner & Secretary ka Tand Food and Civil Supplies, u Pravin Bakshi, ula batai ha kano ka rukom ka jylla kala pyntreikam ia ki sienjam ban khmih ia ka jingkiew ka dor ka mur ha ka jylla bad ban pynneh iaka jingryntih lang. Hynrei ula pynshai pat ba ka jingiapher ka dor ha kiwei pat ki jaka kadei namar ba ki don ki dukan kiba dei ban shim rem katba don pat kiba shim duna bad kumta kala mih ka jingiapher.
