Shillong, Kyllalyngkot 25: U Myntri ka tnad Sports and Youth Affairs ka jylla Bah Shakliar Warjri hynne ka sngi Palei ula buh mawnongrim ban tei iaka Stadium bad Artificial Turf ha ka madan kaba don ha Kynshi Bangla, kaba hap ha Mawthadraishan Constituency.
Ha kane ka jingbuh mawnongrim la ïadon lang u Chief Secretary ka jylla u Bah DP Wahlang, u Deputy Commissioner ka Eastern West Khasi Hills u Bah Gideon Kharmawphlang, u Chief Engineer ka State Sports Council u Bah BM Syiem, ki nongialam shnong bad kiwei kiwei.
Haba kren haka jingialang u Bah Shakliar Warjri uba long ruh u MLA ka thaiñ ula pynpaw iaka jingkmen ban ïoh buh mawnongrim ban tei ïa ka Stadium kaba nyngkong eh hapoh ka district bad ula ong ba ka sorkar jylla kan ialeh ban pynbit pynbiang ia ki jingdonkam jong ki nongialehkai ban pynthikna ba ki khynnah bad ki samla kin kiew shaphrang ha ka kam ialehkai.
Ula iathuh ba ka sorkar kala trei shitom ban pynïoh ki Academy, ki Grassroot Programme bad ban tei ki stadium khnang ba yn lah ban pynmih ia ki samla kynthei bad shynrang ym tang ba kin pynpawnam ïa ka shnong ne district, jylla hynrei ia ka ri hi baroh kawei ha ki snem kiban sa wan.
U Bah Shakliar ula pynpaw ia ka jingangnud ba ki samla ka thaiñ Kynshi Pyllun ba kin iashimbynta ha ki jingialehkai ha ki State Level, National bad International Level bad ula ong ba ka srokar kan trei shitom ban pynurlong ïa ki jingthmu jong ki samla ka jylla kiba don ia ki sap ialehkai bapher bapher.
Ia katei ka Stadium bad ka jingsiang ia u Artificial Turf, ka jingpynlut jingpynsep kan kot T.20 Klur bad la buh por ban tei pyndep ia kane hapoh 2 snem.
