Shillong Kyllalyngkot 26: Ka long ka kaei kaba sngewtynnad bad kaba sngewsarong ia jaidbynriew bad ia ka jylla Meghalaya ba ka Kong Silbi Passah kan ioh pdiang ia ka Khusnam Padma Shri mynta u snem.
Ka Kong Silbi Passah kadei kaba shong basah ha Riatsamthiah, Shillong bad kadei kaba la pawnam bha ha ka jylla ha kaba iadei bad ka jingpynneh pynsah bad ban pyninam iaka rukom tem bad rukom shad tynrai u Khasi.
Ka Kong Silbi kan pynkhreh mynta ban leit ban shimti ia katei ka khusnam naka President jong ka ri India haka jingialang kaban long ha Rashtrapati Bhawan ha u bnai Lber ne Iaiong.
Ka Ministry of Home Affairs jong ka Sorkar Pdeng ha ka sngi Thohdieng hashwa ba ka ri baroh kawei kan rakhe iaka Republic Day, kala pyllait ia ki kyrteng jong ki riewpawkhmat ka ri kiban ioh pdiang ia ka Khusnam Padma Award mynat u snem.
Ka Khusnam Padma Award kadei ka khusnam paidbah ba heh tam jong ka ri, kaba la ai ha ki lai tylli ki bynta kaba kynthup ia ka Padma Vibhushan, Padma Bhushan bad Padma Shri.
Ia ki khusnam la ai ha ki bynta ki jingtrei kiba wanrah ka bha ka miat ha ka imlang sahlang, ki kam ba iadei bad ki paidbah, kam science bad engineering, khaii pateng bad ki kam ba iadei bad ki karkhana, ki dawai, ka thoh bad ka pule puthi, ki kam ialehkai, ki kam ai jingshakri ia ki paidbah bad kiwei kiwei.
Ia ka ‘Padma Vibhushan’ la ai na ka bynta ki jingshakri kiba kyrpang, katba ia ka ‘Padma Bhushan’ la ai na ka bynta ki jingai jingshakri kiba kongsan bad ia ka ‘Padma Shri’ la ai na ka bynta ki jingshakri ha kino kino ki kam bad ia kane ka khusnam la pynbna paidbah ha ka jingrakhe ia ka Republic Day man la ka snem.
Mynta u snem 2024, ka President kala ai jingmynjur ia ki 5 ngut ban ioh pdiang ia ka Padma Vibhushan, 17 ngut iaka Padma Bhushan bad 110 tylli ia ka Padma Shri.
Na kine kiban ioh ia ka khusnam ki kynthup 30 ngut ki longkmie bad la kynthup ruh ia ki 8 ngut ki briew kiba nabar ri/ ki NRI/PIO/ OCI bad 9 ngut ki briew kiba la khlad kiba ioh ia kane ka khusnam.
