Shillong, Nohprah 08 : U Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong hynne ka sngi palei, ula buh ia u mawnongrim ban shna bad pynbha ia kiba bun ki surok ha West Jaintia Hills ha ka jingmang tyngka ba kot T. 84.14 klur.
Ia une u mawnongrim la buh ha Madan Mihmyntdu ha ka jingiadon ryngkat u Myntri kam pynroi ma Sniawbhalang Dhar, bad u MLA ka Jowai ma Wailadmiki Shylla.
Kane ka mang pisa kan kynthup ruh ia ka jingsiang maw bad siang rong ia ka surok shnong ha Niriang (2.08Km) bala mang T. 1,20,87,000.
Ban shna ia ka kynroh bad ka nala ka ban iada ia ka surok ka Madan Thadlaskein via Mission Aitnar sha Mutong bala mang T. 2,13,50,000.
Ban siang maw bad siang rong ia ka surok shnong ha Sabah Muswang ba jrong 2.779 km bala mang T. 2 klur.
Ban shna pynkhlain bad siang maw bad ka rong ia ka surok ha shnong Mihmyntdu kaba jrong 6.677 km n aka skim RIDF-XXVI bala mang T. 5 klur.
Ka jingshna pynbna bad pynkhlain ia ka surok hapoh sor Jowai kaba long haduh 33 Km ia kaba la mang na ka World Bank MIPT haduh T. 28 klur.
Ban shna ia ka jingkieng na KNB sha Thomas Jones College ba 10 Km ha ka mang tyngka ba T. 80 lak.
Ban shna pynheh bad pynkhlain ia ka surok Demthring-Sohmynting- Moodymmai ba 22.30 KM ha ka mang tyngka ba T. 45 klur.
Haba kren ha ka jingialang, u Symbud Myntri Rangbah ula ong ba ka Sorkar Jylla kala trei shitom ban wanrah ia ki kam pynroi bad ia ki kam kiba wanrah ia ka bha ka miat jong ki nongshongshnong ha manla ki jaka jong ka Jylla khamtam ka sienjam bala shim ha kaban pynbha bad shna ia ki surok.
U Bah Prestone ula iaroh ruh ia u MLA ka thain halor ka jingtrei shitom ban kyntiew ia ka Jowai Constituency.
U MLA ka thain ma Wailadmiki Shylla ula ai khublei ia ka Sorkar halor ka jingshimkhia ban pynbna ban shna ia ki surok khamtam ka jingshna ia ka jingkieng ba pyniasoh ia ka surok KNB sha Thomas Jones College, ka jingpynheh bad pynbha ia ka surok Demthring-Sohmynting- Moodymmai ka ban sa iarap shibun ha kaban pynsuba ia ka jingdheng kali ha sor Jowai.
U Myntri kam pynroi sor ma Sniawbhalang Dhar ula ai jingkren ha kane ka jingialang.
