Shillong, Rymphang 07: U Myntri Rangbah ka Jylla Conrad K Sangma ha ka sngi Saitjain, ula buh mawnongrim ban tei ia ka hospital AYUSH ba 100 jingthiah ha Merengipara, South West Garo Hills, hapoh ka National AYUSH Mission.
Kine la iadonlang ki kynthup ia u MLA ka Mahendraganj Sanjay A Sangma, MLA ka Salmanpara Ian Botham M Sangma bad kiwei kiwei ki kynrem ki lyndan.
Haba kren ha ka jingialang, u Myntri Rangbah ula niew ia kane ka jingbuh mawnongrim kum ka khyllipmat kaba khraw eh ia ka thain. Ula ong “Mynta ka sngi, ym dei eh tang ka jingbuh mawnongrim, hynrei ngi la buh ia ka nongrim na ka bynta ka lawei ha kaba ki jaka ai jingsumarba paka kilapoi sha u paidbah ba ki shong ki sah, da ka burom bad ka jingshaniah”.
U ong ba ka AYUSH Hospital ka pyni ia ka jingkut jingmut kaba khlain jong ka Sorkar ban pynpoi ia ki jaka sumar sha man ki jaka khamtam ha ki jaka ba sha kyndong bad ki jaka khappud.
Upyntip ba ia kane ka project la mynjur ha u snem mang tyngka 2025-26 ha ka jingmang pynlut ba T. 7 klur. U pyntip ba la tyrwa ban thungkam ia 35 ngut ha kane ka project bad kine ki kynthup ia ki doktor AYUSH, ki Nurse, ki Nonghikai Yoga.
U Myntri Rangbah ula pynpaw ruh ba kane ka hospital kan shim ia ka bynta kaba kongsanbha ha ka kam sumar ia ki samla kiba la ngop ha ki jingdih buaid bad ka bha ka miat jong ki.
Haba kyntu ia ki nongshongshnong ban shim ia ka jinglongtrai ia kane ka jaka sumar, ula ong “La tei ia ka na ka bynta jong phi, jong ki Khun ki Kti jong phi bad ia ka pateng ban wan”.
