Ha jingdap 53 snem ka Jylla, buh nongrim ka Jylla ia ka sor Shillong ba thymmai
Shillong, Jymmang 21: U Myntri Rangbah ka Jylla Meghalaya Conrad K Sangma ha ka sngi Ba-ar, ula buh ia u maw nongrim ban tei ia ka Secertariat ba thymmai jong ka Shillong Administrative Cite ha Umsawli, New Shillong, kaba la mang ban tei haduh T.1188 klur.
Ha kane ka sngi la iadonlang ki Symbud Myntri Rangbah- Bah Prestone Tynsong bad Bah Sniawbhalang Dhar, ki Myntri Sorkar Abu taher Mondal, kong Ampareen Lyngdoh, Marcuise Marak bad Bah Comingone Ymbon.
Ia kane ka Secretariat ba T.1188 klur yn tei ha ka jaka bah eh 53 acre bad yn tei ia ka ha ryngkat ka Directorate Campus,ki ban pyntrei ha ki artylli ki phase. Ka Complex kan don 68 tylli ki Ophis, ka Auditorium ba ngiam 700 ngut ki briew, bad ki kamra na ka bynta ki 1929 ngut ki nongtrei.
Ka phase ba-ar jong ka complex ban tei ha ka 1.15 lak sq.m ka jaka, kan dei kaba la mang ia ki Directorate ba 56 tylli ki Ophis, ki kamra ia ki 4746 ngut ki nongtrei, artylli ki auditorium ba ngiam mar 200 ngut ki briew.
Ka jingbuh maw nongrim ia ka Secretariat ba thymmai ha ka sngi rakhe ia ka lyngkhuh dap 53 snem jong ka Jylla, ka pyni ia ka jingkut jingmut jong ka Sorkar ban pyntyllun sted bad pyniaid shakhmat ia ki jingtei bapher bapher hapoh ka Jylla.
Haba ai jingkren, u Myntri Rangbah ka Jylla ula ong “Kam dei satia tang ka building bad ka jingtei ka ban sa mih. Ka dei ka jingpyniar ia ka Nongbah jong ka Shillong”.
Halor ka jingpynwandur ia kane ka Secretariat, u Conrad ula ong “Kane kam dei ka video kaba la shna da ka AI. Kane ka dei ka jingpynwandur jong ka jingtei ba shisha kaban sa mih hangne, kaba la shimpor ia ngi la palat shisnem ban pynkhreh” ula ong.
Haba niew ia ka Administrative bad Knowledge City ka ban mih ha New Shillong kum ka “Growth Centre” (ka jaka pynroi ), ula ong “…Haba ngi kynshew ha kane ka Secretariat, haba ngi kynshew ha kiba bun ki surok ba pyniasoh ia ka Nongbah bala don lypa bad kane ka Administrative City ba thymmai, ngi la buh ia u maw nongrim na ka bynta ki shnong ki thaw, ki paidbah, ki trai jaka ha kumba 30sqkm ba kin pynroi ia kane ka New Shillong kum ka jaka ka roi ka par jong ka Jylla jong ngi”.
Ula pyntip ruh ba ka Sorkar kala don jingthmu ruh ban kynshew haduh T.5500 klur ban pynroi ia ka thain New Shillong kynthup sa kumba T.10,000 klur ka jingkynshew kaba dang pynkhreh.
“Kane ka jingkynshew kan pynkylla dur nadong hadong ia ka sor New Shillong” ula ong haba bynrap ba ka Secretariat Building kan long kum ka nongwanrah jingkylla ban pynthikna ba ngin lah ban pyntyllun shakhmat ia kane ka jingphohsniew jong ngi.
Haba kren ha ka jingialang, u Bah Sniawbhalang Dhar ula ong ba kane ka jingtei ba thymmai ka dei kaba la buh nongrim ban pynkupbor ia ka lawei jong ka Jylla.
U Bah Prestone Tynsong ula ong ba kane ka Secretariat ba thymmai ka dei kaba la angnud da u Myntri Rangbah Conrad K Sangma ban pynthikna ba ki jingshakri ka Sorkar bad ka synshar ka khadar kan iaid beit iaid ryntih noh na ka sor Shillong ba thymmai.
“Ngim ju mutdur ba ngin iohi shisha ka jingtei ia ka Secretariat ba thymmai hynrei u CM jong ngi um shym la kut tang ha ka jingphohsniew hynrei ula pynurlong shisha ban nang pyntyllun sted ia ka jingkiew shaphrang bad ka roi ka par jong ka Jylla” ong u Bah Prestone.
Ha kane ka sngi, u Myntri Rangbah ula pyllait paidbah ruh ia ka skhim ba kot T.63 klur na ka bynta ki 6000 ngut ki nongioh jingmyntoi kiba dei na ka CM-ELEVATE, FOCUS, Green Meghalaya+, ki project kam jngohkai bad kiwei kiwei.
