Nongpoh, 21 K’lyngkot: Haba iasnohktilang bad ka jylla Meghalaya, ka Patharkhmah Civil Sub-Division hynne ka sngi Ba-ar, ka la iashimbynta ban rakhe ia ka lyngkhuh dap 53 snem ka jingioh Jylla la ka jong, da kaba pynlong ia ka prokram ba kyrpang ha phyllaw ka ophis treikam u BDO Jirang Block.
Ia kane ka jingrakhe la pynshongkun da ka jingdon lang u Bah Sosthenes Sohtun, MLA Jirang, ka Dr. Margaret Lyngdoh, Folklorist ka University of Tartu ha Ri Estonia, u Bah M.B Tongper, SDO ka Patharkhmah Civil Sub-Division, u Dr. P. Hajong, BDO ka Jirang C&RD Block, ki nongialam Hima, shnong lem bad kiwei.
Haba ai jingkren, u Bah Sosthenes Sohtun, u la ai jingiaroh ia ka ophis Patharkhmah Civil Sub-Division, kiba la pynlong ia katei ka prokram bad ban rakhe kyrpang ia ka sngi ba ka Meghalaya, ka la ïoh ia la ka jong ka jylla kaba pura.
Utei u MLA Jirang, u la ai jingiaroh ia ki nongialeh pynioh jylla ha kito ki snem kiba la leit noh bad ong ba lyngba ka jinglen lade bad jingtrei shitom ka jong ki, ka la pynlong ia ka jylla, ba kan ïoh la ka jong ka jylla.
Haba u kren pat halor ka Jirang Constituency, u Bah Sosthenes Sohtun, u la ong ba ka Ri Bhoi Sepngi, ka la kiew shibun eh haba iadei bad ki kam pynroi ha kine ki khyndiat snem kiba la leit, kata naduh u snem 2018 shaneng, kaba dei ruh ka por ba ia ka sorkar jylla ialam da ka NPP.
Ula ong ba ka Sorkar kala shna pynbha ia ka surok na Umling sha Patharkhmah, ka surok na Baridua sha Umsen bad khamtam eh haba iadei bad ka Model Degree College ha Patharkhmah, ia kaba yn sa plie noh shen ha kine ki khyndiat sngi ban wan.
Namar kata, na ka liang utei u MLA Jirang, u la kyntu ia ki nongialam Hima bad nongialam shnong, ba kin iatrei ryngkat ryngkat bad ka Sorkar, khnang ba ki kam pynroi kin nangwan shuh shuh ha ki shnong kiba hap ha Jirang Constituency.
