Iashimbynta ka kynhun na Meghalaya Assembly sha ka 85th All India Presiding Officers’ Conference ha Bihar

Shillong, K’Lyngkot 21: Ka kynhun ba ïalam da u Symbud Lamphang ka Iingdor thawain ka Meghalaya Timothy D Shira, ka la leit shim bynta ha ka jingïalang kaba 85 jong ka All India Presiding Officers’ Conference, kaba la pynlong ha nongbah Patna, ka Jylla Bihar kaba la long naduh ka 19 tarik haduh 21 tarik mynta u bnai.

Ia ka jingialang All India Presiding Officers’ Conference la plie da u Lamphang ka Lok Sabbha u Om Birla bad u Deputy Chairman ka Rajya Sabha u Harivansh
U Timothy Shira u la ïashim bynta ha ka jingiatai halor ka phang pdeng “75 Anniversary of the Constitution: Contribution of Parliament and State Legislative Bodies in Strengthening Constitutional Values”.

U Bah Andrew Simons u la iashim bynta haka Conference jong ki Secretaries jong ki Legislative Assembly halor ka phang pdeng “Adoption of Modern Technologies in Our Legislative Bodies for Greater Efficiency, Effectiveness, and Productivity”.

Haba kren ha ka jingdap 75 snem jong ka riti synshar ka ri India, u Timothy Shira u la batai ia ka riti synshar kum ka kot kaba iaid shaphrang bad kaba im kaba shakri kum ka mynsiem jong ka synshar paidbah jong ka ri India.

U la pynkynmaw ia ka jinglah ban pyniadei bad ka jinglong ba neh jong ka Riti synshar ka Ri.

“Ka Riti Synshar jong ka ri India, kaba la pdiang ha ka 26 tarik u Naiwieng 1949, la shim ba ka dei kawei na ki Riti Synshar kaba la iaid shaphrang tam ha ka pyrthei. Ka iada ia ka synshar ain bad ka pynthikna ia ka jingsynshar paidbah, ka jingbishar hok ha ka imlang sahlang, bad ka hok jong uwei pa uwei u nongshongshnong. La pynkylla ia ka haduh 106 sien naduh ba la pynlong ain ia ka ha u snem 1950, kaba pyni ia ka jinglah ban shimkhia ia ki jingdonkam kiba nang kiew jong ka imlang sahlang” ong u Timothy.

U Timothy u la kren ruh halor ka bynta jong ka Parliament bad ki Ïingdorbar Thaw Aiñ jong ki Jylla ban kyntiew ïa ki jinglong tynrai jong ka riti synshar ka ri.

“Ka Parliament jong ka Ri India bad ki Ïingdorbar Thaw Aiñ jong ki Jylla ki don ka bynta kaba kongsan ha kaba pynneh ïa ka jingsynshar paidbah, ban ïada ïa ki hok jong uwei pa uwei, bad ban pynroi ïa ka hok ha ka imlang sahlang. Ki aiñ ba pawnam kum ka aiñ Right to Information Act and the Scheduled Castes and Scheduled Tribes (Prevention of Atrocities) Act ki long ki sakhi ïa kane ka jingkular” u la ong.