Buh jingkylli ka ABVP ia ka jingthungkam nonghikai ha Ri-lum Garo, dawa ia ka jingtohkit

Shillong, K’lyngkot 11 : Ka Akhil Bharatiya Vidyarthi Parishad (ABVP), Meghalaya, ha ka sngi Palei kala dawa ban pynsangeh mardor ia ka result bala pynbna halor ka jingthungkam Assistant Teacher ha ki skul Lower Primary ka Sorkar kiba hap hapoh ka Dadenggre Sub Division, West Garo Hills, ban plie lynti ia ka jingtohkit halor ka jingduna kiba bun.

Ha ka shithi sha u Myntri Rangbah ka Jylla Conrad K Sangma, u Secretary ka ABVP Meghalaya Tengku M Marak ula ong ba ka result ba dang shu pynbna shen da ka Tnad Education na ka bynta kikam Assistant Teacher ha ki skul Lower Primary ka Dadenggre Sub Division jong kiba pass MTET khamtam ia ka Unreserved category, kala mih dak jingkylli namar ym shym la don uwei ruh u trai paid riewlum ba mih kyrteng ha ka thup UR category.

Ia kane ka result la pynbna ha ka 10 tarik Kyllalyngkot 2024.

“Namar kata, ka Sorkar ka dei ban phah pynsangeh ia ka jingthungkam. Ka dei ban don ka jingtohkit ban sei madan ia ki daw halor ka jingbym biang ha kane ka result” dawa u Marak.

Une u Nongialam ka ABVP ula buh san tylli ki jingkylli bad dawa ia ka Tnad Pule Puthi ban jubab. Ula kylli “Balei ba ym don ki paid riewlum ba paw kyrteng ha ka thup UR category? Kumno ba tang kawei ka Jaidbynriew kala ioh haduh 33 seat ha ka thup UR category napdeng ka 34?. Hato ym don kiwei ki jaidbynriew ha ka thain kiba la nang la stad ban ioh ia kane ka kam? Ka Tnad Pule Puthi jong ka District kala pyndonkam ia baroh ki lad ki lynti ban pynnang pynstad tang ia kane kawei ka Jaidbynriew? Mano ba donkti ban wanrah ia ka jingsngew ba tang kawei ka Jaidbynriew ka dei kaba biang eh ha ka jingnang jingstad bad kiwei pat ki Jaidbynriew ki dei ki bym biang?.

Ula iai ban ba ka ABVP ka dawa ruh ia ka jingtohkit bad ban ai ka jingleh hok ia kiwei ki nongaplai kam kiba dei ki trai nongshongshnong ka Jylla.