Shillong, Rymphang 14 : Ka Sorkar Jylla kala jer ia ka kyrteng u Judge bala shongthait Justice RS Chauhan kum u Chairman ka Judicial Inquiry Commission, ka ban tohkit ia ka jingbthei ka par dewiong ha Mynsngat-Thangsko, East Jaintia Hills bad ki kam tih dewkong beain ha Jylla.
Ki dkhot ka Commission ki kynthup ia u Ophisar IPS bala shongthait Bah H Nongpluh, u Ophisar IAS bala shongthait Bah PS Dkhar.
Ka kam bala bynshet kam dei eh tang ia ka jingjia Thangsko hynrei ruh balei ba ka jingtih dewiong ka dang don ha Meghalaya, ka jinglah ba ai ia ka song jingiarap pisa sha ki nongtih par, bad ka jinglah ban ioh ia ka jingpynlait jong ka President ia ka jingtih dewiong tynrai ha Jylla.
Ha kajuh ka por, ka Director General of Police Kong Idashisha Nongrang ha ka 12 tarik Rymphang, kala hukum ban thung ia ka Special Investigation Team (SIT) ba khyndai ngut ki dkhot, ba kan tohkit ia ka jingbthei hapoh kane ka par tih dewiong beain.
Ka SIT, ka ban khlieh da u Dy. Inspector General of Police (Eastern Range) Vivekanand S Rathore, kan wad bad pynthikna ia ki daw tynrai bad ki daw ba lam sha kane ka jingjia, ban tohkit ia ka jingpynkhein ia ki hukum ki Iingkashari bad ka jingbthah ka NGT bad ban aiti ruh ia ki jingshem hapoh ka por bala buh.
Ka hukum ka DGO kala bynrap ruh ba ka SIT kan pynthikna ba ka jingtohkit kan poi sha ka jingpynkut kaba don jingmut bad ka jingai ia ka jingbishar ba hok kat kum ka ain.
Ia ka jingwad ia ki briew ba dang jah la pynsangeh noh ha ka 9 tarik Rymphang hadien b aka kynhun ai jingiarap kala pyntip ba ym shuh ki briew kiba dang im.
Saw ngut ki briew kila shah kem bad ki bor Sorkar ki iathuh ba da ki hajar metric ton u dewiong beain la dep ban kurup hapdeng ka jingkhynra kaba jur sha ki jaka sah jong ki nongbylla ha ki jaka ba don ki par dewiong.
Ka hukum khang tih dewiong thliew khnai jong ka NGT bad kumjuh ruh ka jingshalan ia u dewiong ha Meghalaya ka dang treikam naduh u snem 2014, hynrei ka jingtih dewiong beain ka dang don beit haduh mynta.
