Shillong, Nailar 12: U Myntri Khynnah ka Jal Shakti bad Tribal Affairs Bishweswar Tudu hynne ka sngi thohdieng, ula bthah ia ka Jylla Meghalaya bad kiwei kiwei ki Jylla ba kin pyndep noh ia ka Jal Jeevan Mission, kaban pynpoi umbam umdih ha manla ki thliew Iing ha Nongkyndong, hashuwa jong u Lber 2024.
“Ka jingpyntreikam ia ka JJN ha ka National Level ka long hapoh ka 50% bad ngi la ai jingmut ia baroh ki Jylla ba kin pyndep noh hashuwa u Lber 2024” ong u Tudu haba iakren bad ki nongthoh khubor hadien ka jingialang bishar kam halor ka jingpyntreikam ia ka JJM bad kiwei ki flagship programme jong ka Ministry.
Kat kum ka jingong jong u, ka kam kan iaid beit lada ka Sorkar Jylla ka shimkhia ha kane ka mission.
Une u Myntri Khynnah ula ong ba ka jingpyntrei ia ka JJM ha Meghalaya ka dang long hapoh ka 50% bad bynrap “Namar ka jinglong jaka lum, ka jingeh ha ka leit ka wan, ka kit ka bah, kiba bun ki agency kim kwah satia bad sngewtynnad ban trei hangne”.
U Tudu u ong ba kane ka lam sha ka jingpynslem ha kaba pyntreikam ia ki project bad ka don ruh kawei ka project kaba hap ban khot tender haduh ar-lai sien. “Nga la ai jingmut ia ki ba kin bud ia ki kyndon bad lada long kaba lah, ban pynjyn sur ia ki katto katne khnang ba ka kam kan iaid shakhmat” ula bynrap.
Halor ka jingkynnoh bamsap, une u Myntri Khynnah ula ong “Tad haduh mynta ngam pat ioh satia ia ki sakhi da ka jingthoh. Lada nga ioh jingthoh, ngan hiar ban leit jngoh hi dalade ban pynthikna la ki jingkynnoh ki dei kiba shisha ne kiba bakla. Lada dei kaba shisha, ngin shim ia ki lynti pynsajia”.
Shuwa kane, u Myntri Khynnah ula mih na ka jingialang haba bthah ia ki Ophisar ka Sorkar ba kin long kiba la pynkhreh bad ki kot ki sla.
“Kila shu pyni ia nga tang ki jingbatai hynrei ym don kot don sla. Namar kata, nga la bthah ia ki ban leit shim ia ki kot ki sla bad ngin sa shong ia ka jingialang bishar kam” ula ong hashuwa ban pynsdang biang ia ka jingialang.
Haba kylli, u Tudu ula ong “Ngam sngewtynnad satia ia kane ka jingleh namar khlem ki kot ki sla kumno ngin shong bishar kam khamtam ba nga hap ai kaiphod sha ka Tnad ba dei khmih, ka Tnad kam Pohiing bad ki kot ki sla ki dei kiba kongsan bha”.
Hadien kane, u Myntri Khynnah ula ong ba kat kum ka jingbthah jong u, ki Ophisar kila wanrah ia ki kot ki sla ha ryngkat ki jingbatai.
“Kat kum ki kot ki sla bad kat kum ka jingiakren, nga la hun hynrei lashai ka sngi ngan sa leit ban jngoh ia ki katto katne ki project bad hadien kane ngan sa lah ban ai ia ki jingtip ba bniah sha phi. Ka long kaba donkam ban wad la ki bud ne em ia ki kyndon haba pyntreikam ia ki skhim kum ka Vikas Bandhan Yojana, JJM, AMRUT bad kiwei kiwei ki Project” ula ong.
